Islom Karimov nomidagi Toshkent xalqaro aeroporti terminalining estakadasi avtotransport harakatlanishi uchun test rejimida ruxsat etildi, deya xabar bermoqda Transport vazirligi.
Qayd etilishicha, test rejimi 14 kun davom etadi. Undan so‘ng estakadadan foydalanish qoidalari amaliyotga joriy etiladi.
Ma’lum qilinishicha, bir vaqtning o‘zida 30 tagacha transport vositalari estakada bo‘ylab harakatlanishi mumkin. Estakada maxsus sariq chiziqlar bilan ikki qismga ajratilgan. Ularning biri avtobus va mikroavtobuslar uchun mo‘ljallangan bo‘lsa, ikkinchisi taksi uchun ajratilgan. Bu poytaxt aeroportidan chiqayotgan yo‘lovchilarga xizmat ko‘rsatishni yaxshilashga imkon beradi.
O‘ng va chap liniyalarni ajratib turuvchi sariq chiziqni bosish taqiqlanadi va uni bosish qoidabuzarlik hisoblanib, jarimaga sabab bo‘ladi.
Mazkur estakadadan foydalanish uchun litsenziyaga ega bo‘lgan va litsenziya talab shartlari asosida jihozlangan taksi transport vositalari, shuningdek, Turizm va sport vazirligi buyurtmasiga asosan mikroavtobus va avtobuslar, qolaversa, aeroportning VIP va Business Lounge orqali xizmat ko‘rsatiladigan mijozlarning avtotransport vositalari harakatlanishi mumkin bo‘ladi.
Shuningdek, butun estakada bo‘ylab transport vositalarining raqamlarini taniydigan, turini aniqlay oluvchi va ular tomonidan yo‘l harakati qoidalariga rioya qilinishini nazorat etuvchi intellektual videokuzatuv kameralar tizimi o‘rnatilgan. Keyinchalik avtoulovlarning davlat raqamlarini tanib olish texnologiyasi hamda naqd va naqd pulsiz to‘xtash joyi uchun to‘lovlarni amalga oshirish imkonini beradigan zamonaviy avtomatlashtirilgan to‘xtash tizimini joriy etish rejalashtirilgan.
Eslatib o‘tamiz, 20 yildan ortiq (1999-yilda Toshkentda sodir bo‘lgan teraktlardan so‘ng) muddat davomida kutib oluvchi va kuzatuvchilar poytaxt aeroportining terminal binosiga kirish imkoniga ega emas va har qanday ob-havo sharoitida ham tashqarida bo‘lishlari talab qilinadi. Xalqaro aeroportda kutayotganlar uchun ayvon mavjud, ammo mahalliy aviatarmoqlar terminali oldida odamlar ko‘chada kutishiga to‘g‘ri keladi.
Bundan avval Samarqand aeroporti yo‘lovchilar tomonidan unutib qoldirilgan yuklarni utilizatsiya qilishi, Senat Uzbekistan Airways aviachiptalari boshqa aviakompaniyalarnikiga nisbatan 148 foizgacha qimmat ekanini aniqlagani hamda Toshkent xalqaro aeroporti yaqinidagi ko‘prik o‘rniga aylanma yo‘l o‘tkazgich qurilishi haqida xabar berilgandi.
Izoh (0)