Surxondaryo viloyati Sho‘rchi tumanida qarzini so‘rab kelgan sotuvchini qarzdorning o‘g‘li pichoqlab qo‘ydi. Bu haqda viloyat IIB axborot xizmati xabar berdi.
Ma’lum qilinishicha, Sho‘rchi tumanida 2021-yilning 26-iyun kuni soat 20:30 larda tumanning “Oynako‘l” mahallasida yashovchi J.A. qo‘shnisi bo‘lib yashovchi qarindoshi Q.R. ismli ayolning yashash uyiga kelib, undan savdo do‘konidan olgan oziq-ovqat mahsulotlari uchun qarzini so‘ragan.
Shundan so‘ng u ayol bilan o‘zaro tortishib, uni haqorat qilgan. Q.R.ning o‘g‘li J.B. janjalga aralashib, uning onasini haqorat qilgani sababli yashash uyidan oshxona pichog‘ini olib, J.A.ning son qismiga bir marotaba sanchib, hayot uchun xavfli bo‘lgan og‘ir tan jarohati yetkazgan.
Oqibatda J.A.ga tibbiy yordam ko‘rsatish uchun tuman tibbiyot birlashmasiga olib borilayotganida, yo‘lda vafot etgan. J.B.ga nisbatan Jinoyat kodeksining 104-moddasi 3-qismi “d” bandi (jabrlanuvchining o‘lishiga sabab bo‘lgan qasddan badanga og‘ir shikast yetkazish) bilan jinoyat ishi qo‘zg‘atilgan.
Bundan avval Buxoroda 63 yoshli erkak yer talashib, singlisini pichoqlab qo‘ygani, Jizzaxda xotinini xiyonat qilishda ayblab, uni o‘ldirib qo‘ygan shaxs 14 yilga qamalgani hamda Farg‘onada 29 yoshli erkak qo‘shni kelinni pichoqlab o‘ldirgani haqida xabar berildi.
Izoh (0)