Buxoro shahrida piyodaga yo‘l bermay, YTH sodir qilish xavfini tug‘dirgan Damas haydovchisi ushlanib, jarimaga tortildi. Bu haqda “Daryo”ga Vobkent tuman IIB YHXB boshlig‘i Atoqul Hamdamov xabar berdi.
Ta’kidlanishicha, 2021-yilning 29-iyun kuni Buxoro shahrining Islom Karimov ko‘chasida harakatlanib kelayotgan Damas rusumli 80 Z 928 JA davlat raqam belgili avtomashina haydovchisi piyodalar yo‘lakchasida piyodaga yo‘l bermay, harakatini davom ettirgan.
Ijtimoiy tarmoqlarda tarqalgan videolavhada ko‘rinishicha, haydovchining yonida bo‘lgan sherigi xavfni sezib, haydovchiga tojik tilida “to‘xtang, to‘xtang”, degan. Yo‘l harakati qoidasini buzgan Damas haydovchisi esa shoshib qolib, piyodani urib yubormaslik uchun avtomashinasi bilan beton to‘siqqa borib urilgan.
Video ijtimoiy tarmoqlarda tarqalgach, Buxoro viloyat IIB YHXB xodimlari tomonidan surishtiruv harakatlari olib borilgan. 2021-yilning 10-iyul kuni Vobkent tuman ichki ishlar bo‘limi YHXB ma’muriy amaliyot inspektori, katta serjant Baxtiyor Shodiyev Damas haydovchisi shaxsiga aniqlik kiritgan.
Qayd etilishicha, “Kumushkent” MFY Rozmoz qishlog‘ida yashovchi 40 yoshli E.J.ga nisbatan Ma’muriy javobgarlik to‘g‘risidagi kodeksning 128-moddasi (haydovchilarning transport vositalarini piyodalar yo‘laklaridan yurgizishi, yo‘l belgilari va yo‘l harakatining boshqa qoidalari talablariga rioya etmasligi) bilan ma’muriy bayonnoma tuzilib, jarima solingan. Avtomobil esa jarima maydonchasiga joylashtirilgan.
Izoh (0)