Ислом Каримов номидаги Тошкент халқаро аэропорти терминалининг эстакадаси автотранспорт ҳаракатланиши учун тест режимида рухсат этилди, дея хабар бермоқда Транспорт вазирлиги.
Қайд этилишича, тест режими 14 кун давом этади. Ундан сўнг эстакададан фойдаланиш қоидалари амалиётга жорий этилади.
Маълум қилинишича, бир вақтнинг ўзида 30 тагача транспорт воситалари эстакада бўйлаб ҳаракатланиши мумкин. Эстакада махсус сариқ чизиқлар билан икки қисмга ажратилган. Уларнинг бири автобус ва микроавтобуслар учун мўлжалланган бўлса, иккинчиси такси учун ажратилган. Бу пойтахт аэропортидан чиқаётган йўловчиларга хизмат кўрсатишни яхшилашга имкон беради.
Ўнг ва чап линияларни ажратиб турувчи сариқ чизиқни босиш тақиқланади ва уни босиш қоидабузарлик ҳисобланиб, жаримага сабаб бўлади.
Мазкур эстакададан фойдаланиш учун лицензияга эга бўлган ва лицензия талаб шартлари асосида жиҳозланган такси транспорт воситалари, шунингдек, Туризм ва спорт вазирлиги буюртмасига асосан микроавтобус ва автобуслар, қолаверса, аэропортнинг VIP ва Business Lounge орқали хизмат кўрсатиладиган мижозларнинг автотранспорт воситалари ҳаракатланиши мумкин бўлади.
Шунингдек, бутун эстакада бўйлаб транспорт воситаларининг рақамларини танийдиган, турини аниқлай олувчи ва улар томонидан йўл ҳаракати қоидаларига риоя қилинишини назорат этувчи интеллектуал видеокузатув камералар тизими ўрнатилган. Кейинчалик автоуловларнинг давлат рақамларини таниб олиш технологияси ҳамда нақд ва нақд пулсиз тўхташ жойи учун тўловларни амалга ошириш имконини берадиган замонавий автоматлаштирилган тўхташ тизимини жорий этиш режалаштирилган.
Эслатиб ўтамиз, 20 йилдан ортиқ (1999 йилда Тошкентда содир бўлган терактлардан сўнг) муддат давомида кутиб олувчи ва кузатувчилар пойтахт аэропортининг терминал биносига кириш имконига эга эмас ва ҳар қандай об-ҳаво шароитида ҳам ташқарида бўлишлари талаб қилинади. Халқаро аэропортда кутаётганлар учун айвон мавжуд, аммо маҳаллий авиатармоқлар терминали олдида одамлар кўчада кутишига тўғри келади.
Бундан аввал Самарқанд аэропорти йўловчилар томонидан унутиб қолдирилган юкларни утилизация қилиши, Сенат Uzbekistan Airways авиачипталари бошқа авиакомпанияларникига нисбатан 148 фоизгача қиммат эканини аниқлагани ҳамда Тошкент халқаро аэропорти яқинидаги кўприк ўрнига айланма йўл ўтказгич қурилиши ҳақида хабар берилганди.
Изоҳ (0)