Samarqand viloyati Ishtixon shahriga kirib borishda 6 tup zarang va 2 tup shumtol daraxtini kesgan uch nafar fuqaro javobgarlikka tortildi. Bu haqda Ekologiya va atrof-muhitni muhofaza qilish davlat qo‘mitasi matbuot xizmati xabar berdi.
Ma’lum qilinishicha, 7-iyul kuni yo‘l yoqasidagi zarang va shumtol daraxtlari “G‘afur G‘ulom” mahallasida yashovchi fuqaro J.U, “Ravot” mahallasida yashovchi fuqarolar M.D. va I.K. tomonidan o‘zboshimchalik bilan motorli arra orqali kesib tashlangan.
3 nafar fuqaroning har biriga nisbatan Ma’muriy javobgarlik to‘g‘risidagi kodeksning 79-moddasiga (daraxtlarni, butalarni, boshqa o‘simliklarni va nihollarni qonunga xilof ravishda kesish, kundakov qilish, shikastlantirish, yo‘q qilish yoki boshqa joyga ko‘chirib o‘tkazish) asosan 1 million 225 ming so‘mdan jarima hamda 63,7 million so‘m tabiatga yetkazilgan zararni qoplash uchun kompensatsiya hisoblandi.
Hozirda mazkur holat yuzasidan qo‘shimcha tarzda surishtiruv va o‘rganish ishlari davom ettirilmoqda.
Surxondaryoda 109 tup qimmatbaho daraxtni noqonuniy kesgan mas’ul xodim jarimaga tortilgani, Bekobodda hovlisi yonidagi 2 tup chinorni kesgan oila 131 million so‘m zararni to‘lashi, O‘zbekistonda daraxt ekib, parvarish qilmagan mutasaddi tashkilotlarni jarimaga tortish taklif qilingani hamda O‘zbekistonda to‘rt oy davomida 2000 dan ziyod noqonuniy daraxt kesish holatlari aniqlangani haqida xabar berilgandi.
Izoh (0)