Toshkent shahrida aholini emlash uchun maxsus avtobuslar yo‘lga qo‘yildi, deya xabar bermoqda Olmazor tumani hokimligi matbuot xizmati.

Xabarga ko‘ra, endilikda aholini emlash ishlari nafaqat joylardagi emlash punktlarining o‘zida, balki mobil avtobuslarda tashkil etilgan sayyor brigadalar orqali gavjum joylariga borib, aholini COVID-19’ga qarshi ZF-UZ-VAC2001 vaksinasi bilan emlash ishlari boshlandi.

Tuman markaziy ko‘p tarmoqli poliklinika tibbiyot xodimlari tumandagi gavjum joylarida aholini koronavirus infeksiyasiga qarshi ZF-UZ-VAC2001 vaksinasi bilan emlamoqda.

Avvalroq O‘zbekistonda nima uchun kuchaytirilgan karantin joriy etilmayotgani, oliy va o‘rta maxsus ta’lim vaziri videomurojaat bilan chiqib, barchani vaksinatsiyada ishtirok etishga chaqirgani to‘g‘risida xabar berilgandi.

Shuningdek, O‘zbekistonda koronavirusga qarshi emlanganlar soni salkam 2,5 million kishiga yetgani, Toshkentda 28-iyundan 18 yoshdan katta bo‘lgan barcha qatlam koronavirus infeksiyasiga qarshi davlat budjeti mablag‘lari hisobidan ixtiyoriy tarzda ommaviy emlanishi to‘g‘risida ma’lum qilingandi.