Koronavirus infeksiyasini yuqtirganlarni markazlashtirilgan davolash maqsadida Samarqand shahridagi sport majmuasida 1000 o‘rinli saralash va taqsimlash markazi o‘z faoliyatini qayta boshladi. Bu haqda STV xabar qildi.
Markaz 2021-yilning avgust oyida tashkil etilgan va bemorlar sonining kamayishi sababli yopilgandi.
“Bungacha COVID-19 tashxisi qo‘yilgan bemorlar 340 o‘rinli ikkita maxsus kasalxonada davolanardi. Biroq bemorlar sonining ko‘payishi sababli biz markaz ochishga majbur bo‘ldik.
Unda viloyatning shahar va tumanlaridan kelgan bemorlarni davolash uchun zarur bo‘lgan barcha narsalar mavjud. Markazda 100 ga yaqin mutaxassislar ishlaydi”, – deydi Samarqand shahar sog‘liqni saqlash boshqarmasi rahbari Ahmadjon Bobojonov.
Avvalroq Toshkent shahrida DXX tasarrufidagi “Yoshlik” sport majmuasida, IIV tasarrufidagi “Universal” sport majmuasida 700 koyka-o‘ringa mo‘ljallangan kovid-markaz, “O‘zekspomarkaz” 750 o‘rinli koronavirusga chalingan bemorlarni davolashga ixtisoslashgan markaz qaytadan tashkil etilgani to‘g‘risida xabar berilgandi.
Eslatib o‘tamiz, 2020-yil noyabr oyining oxirlarida “Atlas” va “Yoshlik” koronavirusga ixtisoslashgan markazlari, 2020-yil 9-dekabr kuni esa “O‘zekspomarkaz”dagi kovid-markaz yopilgandi. O‘shanda kasallik dinamikasi oshganda yopilgan obyektlar tezkor ravishda qayta ochilishi ma’lum qilingandi.
Izoh (0)