Yevropa Ittifoqi 5-iyul kuni ochlikka qarshi kurash uchun Afg‘onistonga 25 million yevrolik shoshilinch gumanitar yordam ajratishini e’lon qildi. Bu haqda “Interfaks” xabar berdi.
“Mamlakatni qamrab olgan qurg‘oqchilik siyosiy beqarorlik va ziddiyatlar holatini tobora og‘irlashtiradi, shuningdek, hozirda yuz berayotgan COVID-19 pandemiyasining uchinchi to‘lqinini yanada kuchaytiradi”, — dedi inqirozni boshqarish bo‘yicha Yevropa komissiyasining a’zosi Yanez Lenarchich.
Uning ta’kidlashicha, prognozlarga ko‘ra, 2021-yilda Afg‘oniston aholisining yarmi oziq-ovqat va suvning keskin tanqisligidan aziyat chekadi. Qurg‘oqchilik natijasida kamida 11 million kishi oziq-ovqat inqiroziga uchragan va 3,2 million kishi oziq-ovqat bilan bog‘liq favqulodda vaziyatda.
Yangi mablag‘ Yevroittifoq tomonidan Afg‘onistonga insonparvarlik yordami sifatida 2021-yil uchun ajratilgan 32 million yevroga qo‘shimcha bo‘ladi. Ushbu mablag‘ oziq-ovqat, sog‘liqni saqlash, suv ta’minoti, sanitariya va gigiyena tadbirlariga, gumanitar logistikani qo‘llab-quvvatlashga sarflanadi.
Bryussel o‘zining o‘zgarmas qoidasini ta’kidlaydi: Yevropa Ittifoqining barcha gumanitar yordamlari hukumatlar orqali emas, balki BMT agentliklari, xalqaro tashkilotlar va nodavlat tashkilotlar orqali insonparvarlik, betaraflik, xolislik va mustaqillik tamoyillariga muvofiq, butun mamlakat bo‘ylab muhtoj odamlarga to‘g‘ridan to‘g‘ri yetkazib beriladi.
Eslatib o‘tamiz, 11-iyun kuni O‘zbekiston Afg‘onistonga 1000 dona kislorod ballonlaridan iborat gumanitar yordamni topshirgan edi.
Izoh (0)