Angliyada 19-iyuldan koronavirus tufayli joriy qilingan cheklovlarning aksariyatini bekor qilish rejalashtirilmoqda. Ushbu masala bo‘yicha yakuniy qaror 12-iyulda qabul qilinadi. Bu haqda Buyuk Britaniya bosh vaziri Boris Jonson aytib o‘tdi, deb yozmoqda BBC.
Angliyada xususan, majburiy niqob taqish va ijtimoiy masofaga rioya qilish, bino ichida va tashqarisida yig‘ilishi mumkin bo‘lgan odamlar soniga qo‘yilgan cheklovlar hamda majburiy tarzda uydan ishlash bekor qilinadi. Shuningdek, korxonalar faoliyatidagi barcha cheklovlar olib tashlanadi.
19-iyuldan cheklovlarni bekor qilish faqat Angliya uchun rejalashtirilgan — Shotlandiya, Uels va Shimoliy Irlandiyada rasmiylar koronavirusga qarshi choralarni bekor qilish muddatini mustaqil ravishda belgilaydi.
“Agar bizga yordam beradigan yozgi va maktab ta’tillari kelishi bilan yaqin bir necha hafta ichida lokdaundan xalos bo‘lmasak, o‘zimizga shunday savol berishimiz kerak: ‘O‘zi qachon undan voz kechishimiz mumkin?”, — dedi Jonson.
Bosh vazirning ta’kidlashicha, aholini emlashning yuqori sur’ati tufayli cheklovlarni bekor qilish imkoni yaralmoqda. Shu bilan birga, u koronavirusga chalinish bo‘yicha yangi holatlar ko‘payganini tan oldi va pandemiya 19-iyuldan keyin tugamasligini ta’kidladi.
Buyuk Britaniyada aholining 68 foizi COVID-19’ga qarshi emlangan, shulardan 50 foizi vaksinaning ikkala dozasini olgan. Mamlakat emlash darajasi bo‘yicha dunyoda yetakchilar qatoriga kiradi.
Shu bilan birga, Buyuk Britaniyada, jumladan Angliyada, iyun oyining boshidan boshlab koronavirusning delta shtammi bilan kasallanish qayta avj oldi. Mamlakatda har kuni o‘rtacha 24 ming kishida koronavirus aniqlanmoqda; ikki hafta ichida bu ko‘rsatkich 166 foizga o‘sdi. Dastlab, koronavirusga qarshi asosiy cheklovlarni bekor qilish iyun oyining oxiriga rejalashtirilgan edi. Ammo kasallanishning yangi holatlari ko‘paygani sababli uni bir oy keyinga qoldirishga to‘g‘ri keldi.
Eslatib o‘tamiz, Islandiya hukumati 26-iyundan mamlakatda koronavirus tufayli joriy etilgan cheklovlarning barchasini bekor qildi. Mamlakatning 16 yoshdan oshgan aholisining 87 foizi kamida bitta doza bilan, 48 foizi esa to‘liq emlangani sharofati bilan cheklov choralarini bekor qilish imkoniyati yuzaga kelgan.