Turkiyaning Fethiye shahri yaqinidagi sohilda, Belchekiz plyajidan 50 metr masofada ekskursiya safari uyushtirayotgan qayiq cho‘kib ketdi. Qayiq bortida 38 kishi bo‘lgan. Hodisa oqibatida 2 yoshli bola halok bo‘ldi, kattalardan ikki kishi jarohat oldi, deb yozadi “Korrespondent.net”.
Xabarga ko‘ra, halok bo‘lgan bolakay ota-onasi bilan Fransiyadan Turkiyaga ta’tilga kelgan. “Shifokorlarning sa’y-harakatlariga qaramay, bolaning hayotini saqlab qolish imkoni bo‘lmadi”, — deydi jurnalistlar.
Ta’kidlanishicha, avariyadan keyin ko‘pchilik o‘zi mustaqil ravishda qirg‘oqqa yo‘l olgan. Hodisaning ayrim ishtirokchilarini voqea joyiga yuborilgan Sohil xavfsizlik guruhlari, shuningdek, suv taksilari olib ketgan.
Voqea joyiga Fethiye gubernatori Eyup Firat yetib kelgan. “Karterning old qismi teshilgan va u bo‘laklarga bo‘lina boshlagan”, — dedi Firat.
Ma’lum bo‘lishicha, hodisa 3-iyul, shanba kuni sodir bo‘lgan, ammo bu haqda 5-iyul kuni xabar berilgan. Ijtimoiy tarmoqlarda qayiqning qanday buzilib, suvga cho‘kayotgani aks etgan video tarqaldi.
Avvalroq Bangladeshdagi Padma daryosida tezyurar qayiq qum ortilgan yuk kemasi bilan to‘qnashib ketishi oqibatida 26 kishi halok bo‘lgan edi.
O‘rta Yer dengizining Tunis qirg‘oqlari yaqinida esa ichida noqonuniy ko‘chayotgan muhojirlar bo‘lgan ikkita qayiq ag‘darilib, cho‘kib ketgan. Halokat oqibatida kamida 39 kishi halok bo‘lgan. Halok bo‘lganlar orasida ayollar va bolalar ham bor.
Shuningdek, Rossiya bayrog‘i ostidagi “Arvin” quruq yuk tashuvchi kemasi Qora dengizda, Turkiyaning Bartin viloyati sohillari yaqinida cho‘kib ketgani haqida ma’lumot berilgan edi.
Izoh (0)