Turkmanistonda havo haroratining keskin ko‘tarilishi sababli temiryo‘l va havo transporti harakati cheklandi. “Temir yo‘llar” OAJ veb-saytida hamda Turkmaniston fuqarolari aviachiptalar buyurtma qiladigan Saray dasturida tegishli e’lonlar paydo bo‘ldi, deb yozadi “Interfaks”.
Cheklovlar kun o‘rtalarida, havo eng ko‘p qizib ketgan payt (47 daraja) amalga oshiriladigan parvozlarga ta’sir ko‘rsatdi. Ashxobod—Amudaryo yo‘nalishi bo‘ylab harakatlanadigan poezd harakati to‘liq to‘xtatildi, deya xabar beradi Turkmaniston temiryo‘l kompaniyasi sayti.
Turkmaniston sinoptiklarining prognoziga ko‘ra, shu hafta mamlakatda havo harorati 47 darajagacha ko‘tarilishi kutilmoqda, bu bilan meteorologik kuzatuvlar tarixida iyul oyidagi issiqlik yangi rekord o‘rnatadi. Bunday prognozlar munosabati bilan prezident Gurbanguli Berdimuhamedov 2-iyul kuni hukumatga ushbu davrda fuqarolarning sog‘lig‘ini himoya qilish uchun zarur bo‘lgan barcha choralarni ko‘rishni buyurgandi. Shu bilan birga, sinoptiklar hafta oxirida Turkmanistonda harorat 35 darajagacha pasayishi kutilayotganini taxmin qilmoqda.
“Interfaks”ning Yevropa ommaviy axborot vositalariga tayanib, xabar berishicha, Finlyandiya, Norvegiya va Shvetsiyada ham meteorologlar so‘nggi kunlarda rekord darajada yuqori haroratni qayd etdi.
O‘tgan hafta oxirida Finlyandiyaning Laplandiya provinsiyasidagi Kevo qo‘riqxonasida havo harorati 33,5 darajani tashkil etgan, bu 1914-yildan buyon kuzatilgan eng yuqori harorat.
Norvegiya Meteorologiya instituti Qutb doirasiga yaqin Saltdal kommunasida 34 darajani qayd etdi. Bu yil boshidan buyon Norvegiyada qayd etilgan eng yuqori harorat, shuningdek mamlakat tarixida kuzatilgan eng yuqori haroratdan atigi 1,6 daraja past.
Qo‘shni Shvetsiya aholisi ham iyun oyida issiqdan aziyat chekdi. Shvetsiyalik ekologiya faoli Greta Tunbergning Twitter’da yozishicha, Stokgolmda 2019 va 2020-yil iyun oylarida ham juda issiq bo‘lgan, uning fikriga ko‘ra, bu tasodif emas, balki jiddiy iqlim o‘zgarishining natijasi. Xabarlar shuni ko‘rsatadiki, Shvetsiyada 2021-yilning iyun oyi butun meteorologik kuzatuvlar tarixidagi eng issiq iyun oylari ichida uchinchisi bo‘ldi.
Shuningdek, O‘zbekistonda 6—8-iyul kunlari Eron hududlaridan issiq havo massalarining kirib kelishi tufayli jazirama issiq kuchayishi kutilayotgani, ushbu kunlarda havo harorati iqlimiy me’yorlardan 5-8 darajaga yuqori bo‘lishi ma’lum qilingandi. O‘zbekiston 6—8-iyul kunlari termik depressiya ta’siri ostida bo‘lishi kutilmoqda.
Avvalroq Kanadada yuqori havo harorati 85 yillik rekordni yangilagani, anomal issiq havo oqibatida 200 dan ortiq odam halok bo‘lgani, keyinchalik issiq havo qurbonlarining soni 500 kishidan oshgani, anomal issiqlik ortidan mamlakatda o‘rmon yong‘inlari boshlangani haqida xabarlar berilgandi.
Izoh (0)