Rossiyaning Petropavlovsk-Kamchatskiy shahridan Palana posyolkasiga yo‘lovchi parvozini amalga oshirayotgan An-26 samolyoti dengizga quladi. Bu haqda Favqulodda vaziyatlar xizmati vakiliga tayanib, Meduza xabar berdi.
Kamchatka aviatsiya korxonasi ma’lumotlariga ko‘ra, Palanadan to‘qqiz kilometr narida qo‘nish paytidagi manyovrdan oldin 251-sonli reys bilan aloqa yo‘qolgan. Qutqaruvchilar bedarak yo‘qolgan samolyotni qidirib uchgan.
Dastlabki ma’lumotlarda samolyot dengizga yoki Palana yaqinidagi ko‘mir koni atrofiga qulagan bo‘lishi mumkinligi aytilgan.
“Samolyot dengizga qulagan taxminiy nuqta aniqlandi”, — deb yozadi “RIA Novosti”.
An-26 bortida 22 nafar yo‘lovchi, jumladan, ikki bola, shuningdek, oltita ekipaj a’zosi bo‘lgan. “TASS” xabariga ko‘ra, yo‘lovchilarning aksariyati Palana aholisi. Yo‘lovchilar ro‘yxatida Palana posyolkasi rahbari Olga Moxiryeva, Palana ma’muriyati safarbarlik bo‘limi boshlig‘i Aleksandr Andreykin va uning rafiqasi, ma’muriyat moliya bo‘limi boshlig‘i Olga Andreykina ham bo‘lgan. Kamchatka aviatsiya korxonasining bosh direktori Aleksey Xrabrov samolyot jo‘nash oldidan texnik jihatdan yaxshi bo‘lganini aytdi.
Avariyaning ehtimoliy sabablari orasida uskunalarning ishlamay qolishi, ko‘rishning yomonlashuvi va ekipaj xatosi keltirilmoqda.
“TASS” xabar berishicha, An-26 samolyoti 1982 -yildan beri ishlab keladi va uning uchishga yaroqliligi to‘g‘risidagi sertifikat muddati 2021-yil 30-avgustda tugaydi.
Tergov qo‘mitasi tomonidan harakat xavfsizligi va havo transporti ekspluatatsiyasi qoidalarini buzish bo‘yicha jinoyat ishi qo‘zg‘atildi.
Avvalroq Filippinda 92 kishini olib ketayotgan harbiy samolyot halokatga uchragani, halokat qurbonlari soni 45 kishiga yetgani haqida xabar berilgandi.
Izoh (0)