Dunyoda COVID-19 bilan kasallanish darajasi so‘nggi ikki hafta ichida barqarorlashdi. Bu haqda Jahon sog‘liqni saqlash tashkilotining (JSST) sog‘liqni saqlash bo‘yicha favqulodda vaziyatlar dasturi ijrochi direktori Maykl Rayan aytib o‘tdi.
“Agar so‘nggi ikki haftalik kasallanish grafigini qarab chiqsangiz, unda o‘ziga xos barqarorlik paydo bo‘lganini ko‘rishingiz mumkin. Bu juda yuqori darajada sodir bo‘lgan”, — dedi u.
Uning so‘zlariga ko‘ra, dunyoda koronavirus tarqalishining hozirgi holati “ikki-uch oy avvalgidan yaxshiroq”. Shu bilan birga, Rayan ayrim mamlakatlarda kasallik yuqtirishning keskin pasayishi kuzatilganini, ammo boshqa davlatlarda bu holat aksincha ekanini ta’kidladi. Epidemiologning fikriga ko‘ra, bu turli xil omillar, jumladan, koronavirusning yuqumliroq shtammlari paydo bo‘lishi, epidemiyaga qarshi choralarni yumshatish va kishilar o‘rtasidagi aloqalar sonining ko‘payishi bilan bog‘liq.
O‘z navbatida, JSST Favqulodda kasalliklar bo‘limi rahbari Mariya van Kerkxove dunyodagi koronavirus bilan bog‘liq vaziyatni “ikki xil” deb ta’rifladi. Uning so‘zlariga ko‘ra, Amerikada kasallanish bo‘yicha yangi holatlar soni kamaygan (13 foizga), boshqa qit’alarda esa ko‘paygan. Xususan, Yevropada so‘nggi bir hafta ichida infeksiya yuqtirish deyarli 28 foizga oshgan. “Dunyo mamlakatlarining kamida 20 tasida kasallanishning keskin o‘sishi qayd etildi”, — deya qo‘shimcha qildi ekspert.
Ikki hafta oldin JSSTning Rossiyadagi rasmiy vakili Melita Vuynovich koronavirusning delta-plyus shtammi shoshilinch choralarni talab qilishini, aks holda yangi lokdaun kiritishga to‘g‘ri kelishini aytgandi. Uning so‘zlariga ko‘ra, vaksinatsiyaga qo‘shimcha ravishda niqob rejimiga amal qilish kerak, chunki faqat vaksinaning o‘zi delta shtammga qarshi kurashda yetarli emas.
JSST vakili ta’kidlashicha, delta-plyus shtammiga oid vaziyat xavotirli, virus tez tarqalmoqda.
Jahon sog‘liqni saqlash tashkilotining hisob-kitoblariga ko‘ra, butun dunyoda o‘tgan hafta COVID-19 bilan kasallanganlar soni avvalgi hafta bilan taqqoslaganda ortgan, o‘limlar soni esa aksincha, kamaygan.
Jons Hopkins universiteti ma’lumotlariga ko‘ra, pandemiya boshidan beri butun dunyoda infeksiya yuqtirib olganlar soni 184 153 361 kishiga yetgan, shularning 3 984 557 nafari vafot etgan.
Izoh (0)