Европа Иттифоқи 5 июль куни очликка қарши кураш учун Афғонистонга 25 миллион евролик шошилинч гуманитар ёрдам ажратишини эълон қилди. Бу ҳақда «Интерфакс» хабар берди.
«Мамлакатни қамраб олган қурғоқчилик сиёсий беқарорлик ва зиддиятлар ҳолатини тобора оғирлаштиради, шунингдек, ҳозирда юз бераётган COVID-19 пандемиясининг учинчи тўлқинини янада кучайтиради», — деди инқирозни бошқариш бўйича Европа комиссиясининг аъзоси Янез Ленарчич.
Унинг таъкидлашича, прогнозларга кўра, 2021 йилда Афғонистон аҳолисининг ярми озиқ-овқат ва сувнинг кескин танқислигидан азият чекади. Қурғоқчилик натижасида камида 11 миллион киши озиқ-овқат инқирозига учраган ва 3,2 миллион киши озиқ-овқат билан боғлиқ фавқулодда вазиятда.
Янги маблағ Евроиттифоқ томонидан Афғонистонга инсонпарварлик ёрдами сифатида 2021 йил учун ажратилган 32 миллион еврога қўшимча бўлади. Ушбу маблағ озиқ-овқат, соғлиқни сақлаш, сув таъминоти, санитария ва гигиена тадбирларига, гуманитар логистикани қўллаб-қувватлашга сарфланади.
Брюссель ўзининг ўзгармас қоидасини таъкидлайди: Европа Иттифоқининг барча гуманитар ёрдамлари ҳукуматлар орқали эмас, балки БМТ агентликлари, халқаро ташкилотлар ва нодавлат ташкилотлар орқали инсонпарварлик, бетарафлик, холислик ва мустақиллик тамойилларига мувофиқ, бутун мамлакат бўйлаб муҳтож одамларга тўғридан-тўғри етказиб берилади.
Эслатиб ўтамиз, 11 июнь куни Ўзбекистон Афғонистонга 1000 дона кислород баллонларидан иборат гуманитар ёрдамни топширган эди.
Изоҳ (0)