Suvaysh kanalini to‘sib qo‘ygan Ever Given konteyner tashuvchi kemasi 7-iyul kuni suzib ketishi mumkin. Bu haqda kanal ma’muriyatiga tayanib, Reuters xabar berdi.
Kanal rahbariyatining qayd etishicha, ma’muriyat va kema egalari tovon puli masalasini hal qildi. Tomonlar o‘rtasidagi kelishuv 7-iyul kuni imzolanadi.
Avvalroq Ever Given egasi kanal ma’muriyatiga 540 million dollar tovon to‘lashi ma’lum qilingandi. Ta’kidlanishicha, ushbu kelishuvga Suvaysh kanali rahbariyati kema egasiga nisbatan da’vo miqdorini 916 million dollardan 540 million dollarga kamaytirgandan so‘ng erishilgan.
Eslatib o‘tamiz, 23-mart kuni Ever Given kemasi kuchli shamol va qum bo‘roni tufayli yo‘nalishini o‘zgartirib, burun va quyruq qismlari bilan ikkala qirg‘oqqa tiralib qolib, Suvaysh kanalining bir magistralli janubiy qismini to‘sib qo‘ygan edi. Buning natijasida 450 dan ortiq kemadan iborat tirbandlik yuzaga kelgan. Shuningdek, hodisa ortidan neft narxi keskin o‘sgan.
Suvaysh kanali orqali ikki yo‘nalishda ham kemalar harakati 29-mart oqshomidan qayta tiklandi. Sayozlikdan chiqarilgandan beri Ever Given kanal ma’muriyati tomonidan ushlab turilibdi.
Avvalroq Suvaysh kanalining to‘silib qolishi oqibatida yetgan zarar 1 milliard dollarga baholangani haqida xabar berilgandi. Kanal ma’muriyati bo‘lib o‘tgan hodisada Ever Given kemasi kapitanini aybdor deb atadi. Kemaning egasi esa ishni sudga oshirmaslik uchun zararni qoplab bermoqchiligini ma’lum qildi.
Izoh (0)