Dunyo va o‘zbek sportiga oid 29-iyun tongining muhim xabarlari dayjesti bilan tanishing.
O‘zbekiston Superligasining 11-turidan o‘rin olgan bahslar o‘z yakuniga yetdi.
Yevro—2020 haqida
28-iyun kuni 1/8 final doirasidagi ikkita o‘yin bo‘lib o‘tdi. Ispaniya terma jamoasi qo‘shimcha bo‘limlargacha borgan o‘yinda Xorvatiyani mag‘lub etdi (5:3). Fransiya esa penaltilar seriyasida Shveysariyaga yutqazib qo‘ydi (3:3, 4:5).
Ispaniya terma jamoasi Yevro—2012 dan beri ilk bor chorak finalga chiqdi, Xorvatiya esa Yevro—2008 dan keyin birinchi marta nimchorak finalda yurishini to‘xtatdi. Ispaniya Yevro tarixida ilk bor ketma-ket ikki o‘yinda 3+ gol urdi.
Ispanlar darvozaboni Unai Simon jamoadoshi Pedrining 45 metr masofadan bergan uzatmasini to‘xtatishda xatoga yo‘l qo‘ydi va to‘p darvozadan joy oldi. Bu — Yevro tarixidagi eng uzun masofadan urilgan avtogol. Umuman olganda Yevro—2020 da shu vaqtgacha 9 ta avtogol qayd etildi. Bunga qadar barcha Yevropa chempionatida umumiy shuncha avtogol qayd etilgandi.
Fransiya va Shveysariya o‘rtasidagi o‘yinda Yevro—2020 dagi dastlabki penaltilar seriyasi bo‘lib o‘tdi. Kilian Mbappe so‘nggi zarbada adashdi va Fransiya musobaqa bilan xayrlashdi. Fransuzlar yirik musobaqalarda ketma-ket ikkinchi marta penaltilar seriyasida yutqazdi. Bundan avval jamoa JCh—2006 finalida Italiyaga imkoniyatni boy bergandi. Shveysariya esa yirik musobaqada ilk bor penaltilar seriyasini g‘alaba bilan yakunladi.
Karim Benzema Fransiya terma jamoasi safida ketma-ket ikkita o‘yinda 2+ gol urgan Mishel Platinidan keyin ilk futbolchiga aylandi. Bu gollar orqali Benzema Fransiya termasi to‘purarlari ro‘yxatida Zinedin Zidanga yetib oldi (31 tadan gol). Bu o‘yinda Pol Pogba ham o‘z hisobiga gol yozdirib qo‘ydi. Pogba Fransiya safida ketma-ket to‘rtta yirik musobaqada gol urgan ilk futbolchi bo‘ldi.
Shu tariqa Yevro—2020 da uchta chorak final juftliklari ma’lum bo‘ldi:
- Daniya — Chexiya
- Italiya — Belgiya
- Ispaniya — Shveysariya
Belgiyada katta yo‘qotishlar
Portugaliyani bazo‘r yengib, chorak finalga chiqqan Belgiya amaldagi chempionga qarshi o‘yinda ikki yetakchisini yo‘qotdi. Kevin de Bryuyne va Eden Azar jarohat olib, maydonni tark etdi. Bu ikki futbolchi musobaqaga kichik shikastlanishlar bilan kelgan va dastlabki uchrashuvlarda to‘liq harakat qilmagandi.
Amerika Kubogida chorak final juftliklari ma’lum
Braziliya maydonlarida o‘tayotgan Kopa Amerika—2021 ning guruh bosqichi yakunlandi. Unga ko‘ra chorak final juftliklari ma’lum bo‘ldi.
- Peru — Urugvay
- Braziliya — Chili
- Urugvay — Kolumbiya
- Argentina — Ekvador
So‘nggi turda Lionel Messi Argentina safida dubl qayd etdi. Bu Leo uchun terma jamoasi safida 2019-yildan keyingi ilk dubl bo‘ldi. Ushbu bahsda Messi Argentina terma jamoasidagi 148-o‘yinini o‘tkazib, bu borada Xavyer Maskeranoning rekordini (147) yangiladi. Argentina ketma-ket 17 o‘yindan beri yutqazmayapti, bu jamoa tarixidagi uchinchi eng yaxshi natija hisoblanadi.
Transfer yangiliklari
“Bavariya” ikkinchi darvozabon Aleksandr Nyubelni “Monako”ga ikki yilga ijaraga berdi. Myunxenliklar sobiq darvozaboni Sven Ulrayx esa erkin agent maqomida jamoaga qaytdi.
“Bavariya” “Real”ni erkin agent sifatida tark etgan Serxio Ramosga qiziqish bildirmoqda, deya xabar qilmoqda ESPN. Biroq Ramosning nemis klubi safiga o‘tishiga murakkab adaptatsiya jarayoni va til bilmaslik xalal berishi mumkin.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)