Yussuf Poulsen Daniya terma jamoasi kabi Yevro—2020 da yorqin o‘yin namoyish etmoqda.
U orqasida Poulsen deb yozilgan futbolkalari bilan Yevroda qatnashmayapti. Yussufning futbolkasida Yurari familiyasi yozilgan.
Futbolchining to‘liq ismi — Yussuf Yurari Poulsen. Uning otasi tanzaniyalik Shixe Yurari (onasi daniyalik) Daniya va Afrika o‘rtasida qatnaydigan konteyner kemasida ishlagan. Yussuf 6 yoshga kirganda otasi saraton kasalligi tufayli vafot etadi.
“Bu men va oilam uchun og‘ir musibat edi. Biz endi otamsiz yashashni o‘rganishga majbur edik. Yurari familiyasi tushirilgan futbolkada o‘tkazilgan terma jamoa uchun har bir o‘yin meni otam bilan bog‘lab turadi. Futbolga u tufayli kirib kelganman. Otam ham futbol o‘ynardi, faqat havaskor sifatida”, — deya xotirlaydi Yussuf.
Poulsen dastlab onasining familiyasi tushirilgan futbolkada maydonga tushardi, keyinchalik terma jamoada Yurari nomi ostida to‘p tepadigan bo‘ldi. Bu esa uning Poulsen familiyali boshqa daniyalik futbolchilardan ajralib turishini ta’minladi.
Yussuf doim Yurari familiyasi yozilgan futbolkada o‘ynamoqchi bo‘lgan, lekin “Leypsig” va Rangnik barchasini o‘zgartirib yuborgan
Bolalik vaqtlarida hattoki Yussufning o‘zi ham unda iqtidor yo‘qligi ishonib qolardi. Boshqalar ham unda ajralib turadigan aniq bir xislatni ko‘rmasdi. Masalan, Daniyaning “Lyungbu” jamoasida Yussuf bilan birga o‘ynagan sherigi oddiy to‘p uzatilganda, to‘p Poulsendan 3 metr uzoqdan o‘tib ketardi, deb xotirlaydi.
“Leypsig”ga o‘tgandan keyin barchasi o‘zgarib ketdi. O‘shanda jamoa uchinchi ligada o‘ynardi. Murabbiylar daniyalik futbolchiga e’tiborini qaratdi. Jamoaga moslashib ketishiga Yozua Kimmix yordamlashdi. Ikkalasi yotoqxonada birga yashardi. Yussuf “Leypsig”ning quyi diviziondan Chempionlar Ligasiga qadar bo‘lgan yo‘lida birga bo‘lgan ikki futbolchidan biri (ikkinchisi — Dominik Kayzer).
Yussuf Yurari familiyasi bilan futbol o‘ynashni xohlardi. Lekin vaziyat boshqacha tus oladi. “Jamoa bilan muzokara o‘tkazayotganda otamning familiyasida to‘p surish istagida ekanimni aytdim, lekin shartnoma imzolashga kelganimda futbolkalarning orqasida Poulsen familiyasi tushirilganini ko‘rdim. 19 yosh bo‘lganman, futbolkadagi ismni qaytadan almashtirib chiqarishlarini talab qilolmasdim”, — deydi “Leypsig”ga endi kelgan vaqtlarini eslab Yussuf.
Poulsen Bundesliganing ikkinchi divizionida “Leypsig” to‘purari bo‘lgan vaqtda terma jamoadan chaqiruv oladi. Chempionlar Ligasida esa avvalroq o‘ynashi mumkin edi. Myonxengladbaxning “Borussiya”si futbolchiga taklif bilan chiqadi. Ammo Yussuf “Leypsig”ga ishonardi. Jamoa Bundesligaga chiqqach Ralf Hazenhyuttl qo‘l ostida ishlar yurishmadi. Keyin esa jamoaga yangi kelgan Ralf Rangnik uning faoliyatida burilish qilib yubordi.
Poulsen otasi tug‘ilgan Tanzaniyaga tez-tez borib turadi. Lekin Afrika davlati emas, Daniya terma jamoasi sharafini himoya qiladi.
Yussuf Daniya bilan birga JCh—2018 ga bordi. 80 yildan keyin birinchi marta terma jamoaning ketma-ket ikki o‘yinida penalti ishlagan ilk futbolchiga aylandi. Peruga qarshi o‘yinda esa g‘alaba golini urdi. Daniya Rossiyadagi mundialda nimchorak finalgacha bordi va penaltilar seriyasida Xorvatiyaga mag‘lub bo‘ldi.
Yevro—2020 da ham Belgiya va Rossiyaga qarshi o‘yinlarda Poulsen o‘z hisobiga gol yozdirib qo‘ydi.
B guruhidan o‘rin olgan Daniya terma jamoasi 2-o‘rin bilan pley-off bosqichiga yo‘l oldi. Kasper Yulmann shogirdlari Finlyandiya va Belgiyaga mag‘lub bo‘ldi, Rossiya ustidan qozonilgan g‘alabadan so‘ng 3 ochko to‘plagan holda (to‘plar nisbati daniyaliklarda yaxshiroq) 2-o‘rinni egalladi. Pley-offda daniyaliklar Uels ustidan 4:0 hisobida g‘alaba qozondi va chorak finalga yo‘l oldi. 3-iyul kuni chorak finalda Daniya Chexiyaga qarshi bahs olib boradi. Yurarining Yevrodagi sayohati davom etish yoki etmasligi aynan shu o‘yinga bog‘liq.
Izoh (0)