Futbol bo‘yicha Yevro—2020 1/8 finalida Fransiya va Shveysariya terma jamoalari 28-iyun, dushanba kuni o‘zaro to‘qnash keldi.
Uchrashuv fransuzlarning ustunligida boshlangan bo‘lsa-da, birinchi bo‘lib Shveysariya hisobni ochdi. Haris Seferovich 15-daqiqada Shveysariyani oldinga olib chiqdi. Ikkinchi bo‘lim debyutida “bankirlar” ikkinchi golni ham urishi mumkin edi, biroq Rikardo Rodriges penaltidan unumli foydalana olmadi.
57-daqiqada Karim Benzema muvozanatni tiklagan bo‘lsa, oradan ikki daqiqa o‘tib, Karim dublni qayd etgan holda Fransiyani oldinga olib chiqdi. 75-daqiqada Pol Pogba uzoq masofadan darvozaning “to‘qqizlik” burchagini aniq nishonga olib, chiroyli gol muallifiga aylandi.
81-daqiqada Seferovichning golidan keyin o‘yinga intriga qaytdi. Asosiy vaqtning so‘nggi daqiqasida esa Mario Gavranovich hisobni 3:3 ko‘rinishiga keltirdi. Asosiy vaqtda durang qayd etilgach, qo‘shimcha bo‘limlarga murojaat qilindi. Unda ham hisob o‘zgarmadi. Penaltilar seriyasida esa omad Shveysariyaga kulib boqdi.
Shveysariya chorak finalga yo‘l oldi va yarim final yo‘lida Ispaniyaga qarshi bahs olib boradi.
Yevro—2020
1/8 final bahsi
28-iyun, dushanba
Fransiya — Shveysariya 3:3
Penaltilar seriyasi — 4:5Gollar: 0:1 – 15 Seferovich, 1:1 – 57 Benzema, 2:1 – 59 Benzema, 3:1 – 75 Pogba, 3:2 – 81 Seferovich, 3:3 – 90 Gavranovich.
Fransiya: Lyoris, Varan, Kimpembe, Langle (Koman, 46; Tyuram, 111), Pavar, Pogba, Kante, Rabyo, Benzema (Jiru, 94), Mbappe, Grizmann (Sissoko, 88).
Shveysariya: Zommer, Elvedi, Akanji, Rodriges (Mehmedi, 87), Vidmer (Mbabu, 73), Zuber (Fassnaht, 79), Froyler, Jaka, Shakiri (Gavranovich, 73), Embolo (Vargas, 80), Seferovich (Sher, 97).
Ogohlantirishlar: Varan (30), Elvedi (32), Rodriges (62), Jaka (76), Koman (88), Pavar (91), Akanji (108).
Izoh (0)