Toshkent shahri Mirobod tumanida post-patrul xizmati xodimlari xizmat mashinasida aholini vaksina olishga chorlamoqda, deya xabar bermoqda “Daryo” muxbiri.
Ushbu holat aks etgan videoda PPX mashinasida koronavirusga qarshi vaksinatsiya bilan kurashish kerakligi va u bepul ekani haqida ma’lumot berilayotganini ko‘rish mumkin.
Eslatib o‘tamiz, aholini koronavirusga qarshi emlash tadbirlari 1-apreldan boshlandi. Emlash ixtiyoriy va bepul, vaksina olishdan bosh tortganlarga hech qanday chora ko‘rilmaydi. Mamlakatda iyun oyi oxirigacha 4 million kishini koronavirusga qarshi emlash rejalashtirilgan.
Ma’lumot uchun, 29-iyun kuni O‘zbekistonga yana 1 million doza ZF-UZ-VAC2001 vaksinasi olib kelindi. Bundan avval 27-martda — 1 million doza, 27-aprelda — 1 million doza, 18-mayda — 1 million doza, 19-mayda — 500 ming doza, 10-iyunda — 1 million doza partiyalari keltirilgan edi.
Shunday qilib, O‘zbekistonning vaksina zaxirasi 6,4 million dozaga yetmoqda. Ayni paytga qadar shundan 3,4 million dozadan ortig‘i vaksinatsiya jarayonlarida qo‘llanilgan.
Bundan tashqari, Toshkentda 28-iyundan 18 yoshdan katta bo‘lgan barcha qatlam koronavirus infeksiyasiga qarshi davlat budjeti mablag‘lari hisobidan ixtiyoriy tarzda ommaviy emlanishi ma’lum qilindi.
Izoh (0)