O‘zbekistonda koronavirus infeksiyasi bilan kasallanish holatlari so‘nggi kunlarda ortib borayotgani inobatga olinib, Respublika maxsus komissiyasining qaroriga asoslanib, Qashqadaryo viloyatidagi tartib va cheklovlarga qo‘shimchalar kiritildi. Bu haqda viloyat hokimligi axborot xizmati rahbari Ahror Sodiqov ma’lum qildi.
Unga ko‘ra, 2021-yilning 28-iyunidan:
- viloyat hududida ko‘ngilochar obyektlar — restoran, tungi klublar, diskoteka, karaoke, bilyard zallari va kompyuter o‘yinlari markazlari hamda umumiy ovqatlanish obyektlari — kafe, oshxona, choyxonalarni ishlashiga soat 8:00 dan 22:00 gacha ruxsat beriladi;
- ko‘ngilochar va umumiy ovqatlanish obyektlarida tashrif buyuruvchilarga ushbu muassasalarning umumiy sig‘imining 50 foizidan qat’iy oshirmagan holda xizmat ko‘rsatadi;
- supermarket va boshqa yirik do‘konlarning kirish-chiqish joylarini pirometrlar, dezinfeksion “to‘shaklar” va antiseptik vositalari bilan jihozlanib, ularga kirishda har bir fuqaroning tana haroratini o‘lchab, 37C va undan yuqori bo‘lgan yoxud infeksiya alomatlari mavjud bo‘lgan holatda kiritmaslik, ijtimoiy masofani saqlash, tibbiy niqobda bo‘lishi ta’minlanadi;
- barcha bozorlar — dehqon va buyum bozorlari, pishirilgan taomlar bilan savdo qiluvchi bozorlar, kunlik bozorlar, qurilish mollari bilan savdo qiluvchi bozorlar, avtomobil va ulgurji bozorlar haftaning bir kunini sanitar-tozalash uchun yopishni shaxsan nazoratga oladi;
- kunlik va juma namozlarini faqat masjidning ochiq havodagi maydonlarida (ochiq ayvonlar, masjid hovlisi, masjidga tutash ichki ko‘chalar) tibbiy niqobda bo‘lish va oraliq masofani saqlagan holda tashkil etiladi;
- koronavirus infeksiyasi bilan kasallangan bemorlar va ushbu infeksiyasini yuqtirganlikda gumon qilingan shaxslarga qo‘shimcha qulayliklar yaratish maqsadida Qarshi shahridagi “Sho‘rtan gaz kimyo majmuasi” MChJ balansidagi “Geolog” sport majmuasida tashkil etilgan COVID-19 taqsimlash markazi faoliyati qayta tiklanadi.
Qashqadaryo viloyati maxsus komissiyasining 28-iyun kuni o‘tkazilgan yig‘ilishida vohadagi koronavirus bilan bog‘liq vaziyat va Respublika maxsus komissiyasining qabul qilingan qarorini joriy etish masalalari ko‘rib chiqilgandi. Muhokamada viloyat rahbarining voha ahliga yo‘llagan murojaati yuzasidan aholi tomonidan qoldirilgan izohlarga ham e’tibor qaratilgan. Zoir Mirzayev 300 nafardan ortiq fuqaro murojaat yuzasidan takliflar bilan chiqqanini, viloyatdagi iqlimni hisobga olib, ovqatlanish obyektlarining ish vaqtini soat 22:00-23:00 ga qadar uzaytirish taklifi ham ko‘p tushganini aytgandi.
“Vohadoshlarimiz takliflarini inobatga olib, umumiy ovqatlanish obyektlari — kafe, oshxona, choyxonalarning ishlashiga soat 08:00 dan 22:00 gacha ruxsat berilishini taklif qilaman”, — degan edi Zoir Mirzayev.
Izoh (0)