Qonunchilik palatasidagi O‘zLiDeP fraksiyasining 28-iyun kuni bo‘lib o‘tgan navbatdagi yig‘ilishida “O‘zbekiston Respublikasining Jinoyat kodeksiga hamda O‘zbekiston Respublikasining Ma’muriy javobgarlik to‘g‘risidagi kodeksiga o‘zgartishlar kiritish haqida”gi qonun loyihasining muhokamasi bo‘lib o‘tdi.
Amaldagi qonunchilikda, xizmat vazifasini bajarayotgan hokimiyat vakilining qonuniy faoliyatiga yoki fuqaroviy burchini bajarayotgan shaxsga faol qarshilik ko‘rsatish — BHMning 50 baravarigacha miqdorda jarima yoki 360 soatgacha majburiy jamoat ishlari yoxud uch yilgacha axloq tuzatish ishlari yoki bir yilgacha ozodlikni cheklash yoki bir yilgacha ozodlikdan mahrum qilish bilan jazolanadi.
Loyihaga ko‘ra, Jinoyat kodeksining 219-moddasi 1-qismi sanksiyasidagi jazo choralari kuchaytirilmoqda.
Endi jarima miqdori BHMning 50 baravaridan 100 baravarigacha oshirilib, bir yildan uch yilgacha ozodlikni cheklash jazo chorasi kiritilmoqda va ozodlikdan mahrum qilish jazosi bir yildan uch yilgacha kuchaytirilishi ko‘zda tutilmoqda.
“Milliy tiklanish” partiyasi rahbari Alisher Qodirovning ma’lum qilishicha, so‘nggi vaqtlarda huquqni muhofaza qiluvchilarga tajovuz kayfiyati ortib bormoqda. Bunday holatlar 2018-yilda 24,1 ming marta 2020-yilda esa 39 mingta qayd etilgan.
Deputatlarning fikriga ko‘ra, javobgarlikni belgilash orqali hokimiyat vakillarining huquqiy himoyasi ta’minlanadi.
Izoh (0)