Видео: Тошкент кўчаларида аҳолини вакцина олишга чорлаётган ППХ машинаси

Тошкент шаҳри Миробод туманида пост-патруль хизмати ходимлари хизмат машинасида аҳолини вакцина олишга чорламоқда, дея хабар бермоқда «Дарё» мухбири.

Ушбу ҳолат акс этган видеода ППХ машинасида коронавирусга қарши вакцинация билан курашиш кераклиги ва у бепул экани ҳақида маълумот берилаётганини кўриш мумкин.

Эслатиб ўтамиз, аҳолини коронавирусга қарши эмлаш тадбирлари 1 апрелдан бошланди. Эмлаш ихтиёрий ва бепул, вакцина олишдан бош тортганларга ҳеч қандай чора кўрилмайди. Мамлакатда июнь ойи охиригача 4 миллион кишини коронавирусга қарши эмлаш режалаштирилган.

Маълумот учун, 29 июнь куни Ўзбекистонга яна 1 миллион доза ZF-UZ-VAC2001 вакцинаси олиб келинди. Бундан аввал 27 мартда — 1 миллион доза, 27 апрелда — 1 миллион доза, 18 майда — 1 миллион доза, 19 майда — 500 минг доза, 10 июнда — 1 миллион доза партиялари келтирилган эди.

Шундай қилиб, Ўзбекистоннинг вакцина захираси 6,4 миллион дозага етмоқда. Айни пайтга қадар шундан 3,4 миллион дозадан ортиғи вакцинация жараёнларида қўлланилган.

Бундан ташқари, Тошкентда 28 июндан 18 ёшдан катта бўлган барча қатлам коронавирус инфекциясига қарши давлат бюджети маблағлари ҳисобидан ихтиёрий тарзда оммавий эмланиши маълум қилинди.