Hindistonning Reliance konglomerati Google bilan hamkorlikda yaratilgan JioPhone Next smartfonini taqdim etdi. 24-iyun kuni bo‘lib o‘tgan matbuot anjumani davomida Reliance raisi Mukesh Ambanining shaxsan o‘zi ishtirok etgan, deb xabar beradi IXBT.
Yangi smartfonning texnik tavsiflariga oid batafsil ma’lumotlar hozircha yo‘q. Suratlarda qurilma odinar kamera va orqa panelida daktiloskopik datchik bilan jihozlanganini ko‘rish mumkin. Mukesh Ambani JioPhone Next 10-sentabrdan sotuvga chiqishini hamda u “Hindiston va butun dunyodagi eng arzon telefonga aylanishini” ma’lum qilgandi. Umuman olganda, qurilma narxi hozircha e’lon qilinmagan.
Alphabet bosh direktori Sudar Pichai esa o‘z bayonotida smartfonning dasturiy ta’minoti to‘g‘risida to‘xtalib o‘tgan. JioPhone Next smartfoni Android Go operatsion tizimi ostida ishlaydi va unga Google Camera Go, Chrome va Google Play dasturlari o‘rnatilgan bo‘ladi. Sundar Pichaining so‘zlariga ko‘ra, uning Mauntin-Vyudagi jamoasi “Android operatsion tizimini mazkur qurilma uchun maxsus optimallashtirgan”. Press-relizda ta’kidlanishicha, u Android yangilanishlarini qo‘llab-quvvatlaydi va “qo‘shimcha funksiyalarga” ega bo‘ladi. Shuningdek, suratda ovozli yordamchi, tarjimon va qo‘shimcha reallikka ega “aqlli” kamera elementlari haqida ham so‘z boradi.
Bundan tashqari, bu turdagi smartfonning paydo bo‘lish sababi ham keltirib o‘tilgan: gap shundaki, 300 million foydalanuvchi hamon 2G texnologiyasiga bog‘langan va mamlakatda eskirgan aloqa tizimidan qutulish uchun ularga “o‘ta hamyonbop” yechim taklif etilishi kerak.
Avvalroq Nokia 105 va Nokia 110 — eng arzon tugmali telefonlar taqdim etilgani to‘g‘risida xabar berilgandi.
Izoh (0)