O‘zbekistonda U-1 Championship nomi bilan yangi MMA promousheni tashkil etildi. Bu haqda “Daryo” muxbiri xabar qilmoqda.
25-iyun kuni Toshkentdagi Hyatt Regency mehmonxonasida 7SABER sport kiyimlari va jihozlari taqdimoti doirasida U-1 Championship MMA promousheni va 7 Fighting Series jamoaviy musobaqasi tashkil etilgani e’lon qilindi.
U-1 Championship promousheni ikkita ligaga ajratiladi — birinchi liga (bronza) va oliy liga (kumush).
Birinchi ligada professional rekord va tajribaga ega bo‘lmagan O‘zbekiston, Qirg‘iziston, Tojikiston, Qozog‘iston, Rossiya va boshqa mamlakatlar MMA jangchilari ishtirok etadi.
Oliy ligada esa O‘zbekiston va boshqa mamlakatlarning professional rekordga ega MMA vakillari qatnashadi.
Har ikki ligada 9 ta vazn toifasida bo‘yicha janglar o‘tkaziladi. Har bir ligada yiliga 12 tadan (umumiy 24 ta) musobaqa o‘tkazish rejalashtirilgan.
7 Fighting Series musobaqasida har birida 7 tadan jangchiga (7 xil vazn toifasida) ega 20 ta jamoa ishtirok etadi. Ishtirok etadigan har bir klub nom va logotipga ega bo‘ladi. Musobaqa ikkita bosqichda bo‘lib o‘tadi. Asosiy musobaqada 16 ta jamoa 1/8 final bosqichidan boshlab bosh sovrin uchun kurashadi. G‘olibga ko‘chma kubok topshiriladi va bu sovrin jamoada keyingi chempion aniqlangunicha qoladi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)