Dunyo va o‘zbek sportiga oid 25-iyun tongining muhim xabarlari dayjesti bilan tanishing.
O‘zbekiston
O‘zbekiston futzal milliy terma jamoasi 24-iyun kuni Venesuelaga qarshi o‘rtoqlik o‘yinida ishtirok etdi. Uchrashuvda 3:3 hisobidagi jangovar durang qayd etildi. O‘zbekistonliklar safida Dilshod Rahmatov dubl qayd etgan bo‘lsa, yana bir golga Akbar Usmonov muallif bo‘ldi.
Misrda bo‘lib o‘tayotgan “Arab Cup U-20” musobaqasi guruh bosqichi 2-turida O‘zbekiston U-18 terma jamoasi 24-iyun kuni Tunisga qarshi bahs olib bordi. Unda tunisliklar minimal hisobdagi g‘alabani qo‘lga kiritdi. Shu tariqa ketma-ket ikkita o‘yinni boy bergan Eldor Magdiyev shogirdlari pley-off yo‘llanmasidan quruq qoldi. Jamoa so‘nggi turda 27-iyun kuni Yamanga qarshi bahs olib boradi.
Toshkentda OChL bahslari
Osiyo Chempionlar Ligasi sharq mintaqasining H va I guruhida markazlashgan tizimda o‘tkazilayotgan guruh bosqichi start oladi. E’tiborlisi, bu uchrashuvlarga O‘zbekiston mezbonlik qiladi. 25-iyun kuniga mo‘ljallangan “Tampines Rovers” (Singapur) va “Gamba Osaka” (Yaponiya) o‘rtasidagi bahsga “Lokomotiv” stadioni mezbonlik qilsa, “Chiangray Yunayted” (Tailand) — “Chonbuk Motors” (Janubiy Koreya) uchrashuvi “Bunyodkor” o‘yingohida bo‘lib o‘tadi.
Yana doping bilan bog‘liq mojaro
O‘zbekistonlik sambo ustasi Dilshod Choriyevda doping aniqlangani ma’lum bo‘ldi. O‘z vaqtida dzyudoda Osiyo chempionati va Osiyo o‘yinlari g‘olibiligini qo‘lga kiritgan, Jahon chempionati sovrindorlari qatoridan joy olgan Choriyev 4 yilga sportga oid har qanday faoliyatdan chetlatildi.
Jahon
UEFA “safardagi gol” qoidasini bekor qildi. Endilikda YChL, Yevropa Ligasi va UEFA tasnifidagi boshqa musobaqalar pley-off bosqichida bu qoida amal qilmaydi.UEFA tasnifidagi musobaqalarda 1965/66-yilgi mavsumdan beri amal qilib kelayotgan bu qoidaga ko‘ra pley-off bosqichida ikki o‘yin hisobi teng kelib qolsa, safarda eng ko‘p gol urgan jamoa keyingi bosqichga yo‘l olardi.
Ali Dai Ronalduni tabrikladi
Terma jamoalar safida gol urish borasida Ali Daining rekordini takrorlagan Krishtianu Ronaldu eronlik sobiq futbolchidan tabrik qabul qilib oldi.
Krishtianu Ronaldu tabrigimni qabul qil. Bu rekord Ronalduga tegishli bo‘lishi men uchun sharaf. U insonlarni ilhomlantiradigan va butun dunyo hayotiga ta’sir o‘tkaza oladigan buyuk chempion. Olg‘a!Futbol qiroli Pele ham Ronalduni bu natija bilan muborakbod etdi.Ali Dai, sobiq futbolchi
“Navbatdagi rekord bilan tabriklayman. Senga muxlislik qilaman!”, — deya yozadi Pele Instagram sahifasida.
Fransiyaning koinotdagi muxlisi
Fransiyalik kosmonavt Toma Peske koinotdan turib Yevro—2020 musobaqasini kuzatayotgani tasvirlangan suratni ijtimoiy tarmoqqa joyladi.
“Fransiya — Portugaliya o‘yinini ko‘ryapman. Biz Yevroda oson bo‘lmagan guruhda edik, biroq shu sabab o‘yinlar juda qiziqarli bo‘ldi”, — deya yozadi Peske.
Fransiya terma jamoasida 2 ta jarohat
“Uch ranglilar” mashg‘uloti vaqtida Markus Tyuram va Toma Lemar jarohat oldi. Tyuram mushaklarini shikastlab olgan bo‘lsa, Lemar darvozabon bilan to‘qnashib ketib, oyog‘idan jarohat olgan. Ikkisi ham mashg‘ulotni erta yakunlagan, Lemarning jarohati jiddiy ekani aytilmoqda.
“Ufa” Oston O‘runov transferidan voz kechdi
Bu haqda ufaliklar bosh direktori Shamil Gazizov ma’lum qildi. Uning qayd etishicha, tomonlar to‘lov muddatlarini kelisha olmagan va shu sabab “Ufa” futbolchini transfer qilish variantidan voz kechgan. Avvalroq “Ufa” O‘runov transferi uchun 1 million yevrodan oshiq mablag‘ to‘lashga tayyor ekani, biroq bu pulni 2022-yilda uchga bo‘lib to‘lay olishi aytilgandi.
O‘runov “Spartak” bilan chet el yig‘iniga bormaydi va mavsum oldi tayyorgarlik jarayonini o‘rinbosarlar tarkibi bilan o‘tkazadi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)