Ўзбекистонда U-1 Championship номи билан янги MMA промоушени ташкил этилди. Бу ҳақда «Дарё» мухбири хабар қилмоқда.
25 июнь куни Тошкентдаги Hyatt Regency меҳмонхонасида 7SABER спорт кийимлари ва жиҳозлари тақдимоти доирасида U-1 Championship MMA промоушени ва 7 Fighting Series жамоавий мусобақаси ташкил этилгани эълон қилинди.
U-1 Championship промоушени иккита лигага ажратилади — биринчи лига (бронза) ва олий лига (кумуш).
Биринчи лигада профессионал рекорд ва тажрибага эга бўлмаган Ўзбекистон, Қирғизистон, Тожикистон, Қозоғистон, Россия ва бошқа мамлакатлар MMA жангчилари иштирок этади.
Олий лигада эса Ўзбекистон ва бошқа мамлакатларнинг профессионал рекордга эга MMA вакиллари қатнашади.
Ҳар икки лигада 9 та вазн тоифасида бўйича жанглар ўтказилади. Ҳар бир лигада йилига 12 тадан (умумий 24 та) мусобақа ўтказиш режалаштирилган.
7 Fighting Series мусобақасида ҳар бирида 7 тадан жангчига (7 хил вазн тоифасида) эга 20 та жамоа иштирок этади. Иштирок этадиган ҳар бир клуб ном ва логотипга эга бўлади. Мусобақа иккита босқичда бўлиб ўтади. Асосий мусобақада 16 та жамоа 1/8 финал босқичидан бошлаб бош соврин учун курашади. Ғолибга кўчма кубок топширилади ва бу соврин жамоада кейинги чемпион аниқлангунича қолади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)