Mbappe bilan shartnoma imzolagan “PSJ”, katta transferlar arafasida turgan Manchester klublari va hal qiluvchi pallaga kirgan Yevro—2020. Eng so‘nggi sport yangiliklari

Dunyo va o‘zbek sportiga oid 26-iyun tongining muhim xabarlari dayjesti bilan tanishing.

O‘zbekiston

Futbol bo‘yicha Superliganing 11-tur uchrashuvlari 25-iyun kuni start oldi. “So‘g‘diyona” — “Lokomotiv” va “Turon” — “Mash’al” uchrashuvlari nursiz durang bilan yakunlandi. 26-iyun kuni uchrashuvlar davom ettiriladi. “Metallurg” “Navbahor”ga qarshi bahs olib borsa, “Qizilqum” “Bunyodkor”ni qabul qiladi.

Shuningdek, O‘zbekistonda 25-iyundan markazlashgan tizimda o‘tkazilayotgan OChL sharqiy mintaqasi ikkita guruhidagi o‘yinlar start oldi. Dastlabki kunda “Gamba Osaka” “Tampins Rovers”ni taslim etdi (2:0), “Chonbuk” esa “Chiangray Yunayted”dan ustun keldi (2:1).

“2021-yilda Tokio shahrida (Yaponiya) bo‘lib o‘tadigan Olimpiya va Paralimpiya o‘yinlarida O‘zbekiston sport delegatsiyasining ishtirokini ta’minlash hamda olimpiya sport turlarini yana-da rivojlantirish chora-tadbirlari to‘g‘risida” O‘zbekiston Respublikasi Prezidenti qarori e’lon qilindi.

Jahon

Yevro—2020 musobaqasining 1/8 final bosqichi 26-iyun kuni start oladi. Tomoshabinlarni Uels — Daniya va Italiya — Avstriya uchrashuvlari kutib turibdi.

Gracenote portali Yevro—2020 chempionligiga favoritlar va finalning ehtimoliy ishtirokchilari taxmin qildi.

Chempionlik uchun imkoniyati eng yuqori jamoalar:

• Angliya — 16,5%,
• Belgiya — 15%,
• Fransiya — 11,8%,
• Italiya — 10,1%,
• Ispaniya — 7,6%,
• Niderlandiya — 7,6%.

Ehtimoliy finallar:

• Belgiya — Angliya: 7%,
• Fransiya — Angliya: 5,9%,
• Italiya — Angliya: 5,2%,
• Ispaniya — Angliya: 4,3%,
• Belgiya — Niderlandiya: 4,2%.

UEFA Yevro—2020 vaqtida musulmon futbolchilar matbuot anjumani vaqtida stol ustida pivoni ko‘rishni istamasa, uni olib qo‘yadi. Bu haqda tashkilot xodimi ma’lum qildi. Qayd etilishicha, bu amaliyot Heineken kompaniyasini tashvishga solmaydi va ular bunga qarshi emas. Eslatib o‘tamiz, homiylardan biri bo‘lgan kompaniyaning alkogolsiz pivo ichimligi matbuot anjumani vaqtida stol ustida turadi.

Jeydon Sancho “Manchester Yunayted”ga o‘tishga yaqin. “Borussiya D” va ingliz klubi muzokaralarning so‘nggi bosqichida bo‘lib turibdi. So‘nggi detallar hal bo‘lgach, shartnoma imzolanadi. Avvalroq dortmundliklar Sancho uchun 95 million yevro talab qilishi xabar qilingandi.

“Manchester Siti” ham yirik transfer ustida ishlamoqda. “Shaharliklar” “Aston Villa” yarim himoyachisi Jek Grilish transferi bo‘yicha kelishuvga erishgani xabar qilinmoqda. ESPN’ga ko‘ra, transfer 100 million funtga baholangan. Bu APL rekordi hisoblanadi.

“PSJ” kichik Mbappe bilan shartnoma imzoladi. Parijliklar Kilian Mbeppening ukasi Itan Mbappe bitim imzolanganini ma’lum qildi. 2006-yilda tug‘ilgan futbolchi “PSJ” bilan 2024-yilning yoziga qadar mo‘ljallangan kelishuv imzoladi.

“Yuventus” yana Eldor Shomurodov bilan qiziqmoqda. Nikolo Skiraning xabar qilishicha, turinliklar 25 yoshli o‘zbekistonlik futbolchi borasida “Jenoa” vakillari bilan suhbat olib borgan va u haqida ma’lumot so‘ragan.