O‘zbekiston Tashqi ishlar vaziri Abdulaziz Komilov 2021-yilning 24-iyun kuni mamlakatdagi diplomatik missiyasi yakunlanayotgan Germaniyaning Favqulodda va muxtor elchisi Gyunter Overfeldni qabul qildi. Bu haqda vazirlik matbuot xizmati xabar qildi.
O‘zbekiston tashqi siyosat idorasi rahbari Germaniya elchisining ikki tomonlama munosabatlarni sifat jihatidan yangi bosqichga ko‘tarish bo‘yicha faoliyatini yuqori baholadi. Xususan, 2019-yilda davlatlar rahbarlarining o‘zaro tashriflari va 2021-yil mart oyida O‘zbekiston Prezidenti Shavkat Mirziyoyev va Germaniya federal kansleri Angela Merkel o‘rtasidagi onlayn muzokaralar davomida erishilgan kelishuvlarni amalga oshirishni davom ettirishning muhimligi qayd etildi.
Tomonlarning siyosiy, savdo-iqtisodiy, investitsiyaviy va madaniy-gumanitar sohalarda hamkorlikni yanada mustahkamlashga tayyor ekanligi tasdiqlandi.
G.Overfeld, o‘z navbatida, uning O‘zbekistonda muvaffaqiyatli faoliyat yuritishida ko‘rsatilgan ko‘mak va yaratilgan sharoitlar uchun minnatdorlik bildirdi.
Bundan avval Tashqi ishlar vazirligi O‘zbekistonda maxfiy biologik qurol ishlab chiqarilayotganini rad etgani, Abdulaziz Komilov Antaliyada Pokiston tashqi ishlar vaziri Shoh Mahmud Qurayshiy bilan uchrashgani hamda Tojikistonning O‘zbekistondagi yangi elchisi tayinlangani haqida xabar berilgandi.
Izoh (0)