Botir Qurbonov O‘zbekiston yaqin oylarda 2020-yilning yozidagi kabi dahshatni boshdan kechirishi mumkinligi to‘g‘risidagi xabarlarga munosabat bildirdi

Shifokor Azizbek Boltayev O‘zbekiston yaqin oylarda 2020-yilning yozidagi kabi dahshatni boshdan kechirishi mumkinligini aytgandi. Koronavirusga qarshi kurashish shtabi a’zosi, Sanitariya-epidemiologik osoyishtalik va jamoat salomatligi xizmati boshlig‘i o‘rinbosari Botir Qurbonov 24-iyun kuni o‘tkazilgan brifingda shifokor aytgan gaplarga munosabat bildirdi.

“Shifokor Azizbek Boltayev respublikada olib borilayotgan tadbirlar to‘g‘risida kerekli vazirlik va idoralar yoki tashkilotlar bilan suhbatlashmagani, muzokaralar olib bormagani yaqqol sezilib turibdi”, — deydi Botir Qurbonov.

Uning ta’kidlashicha, respublikada 2020-yil 15-martda kasallik birinchi marta qayd etilgan bo‘lsa, bugungi kunda mamlakatning barcha ma’muriy hududlarida ushbu kasallikka qarshi kurashish tadbirlari, ya’ni kasallik kelib chiqishi, uning yuqish omili, kasallikka qarshi kurashish tadbirlarining hududlar kesimida o‘ziga xos shakllanishi doimiy ravishda o‘rganib kelinmoqda.

Azizbek Boltayev O‘zbekistonda koronavirus bilan kasallanish ortishi yangi yilga to‘g‘ri keladi deb taxmin qilganini, ammo bu hozir yuz berayotganini aytib, bunga bemor koronavirusga chalinganidan keyin unda 7 oygacha virusga qarshi immunitet paydo bo‘lib, keyin qonda antitanalar miqdori keskin kamayib, qayta kasallanish xavfi ortishini sabab qilib ko‘rsatgandi.

“Biolog sifatida, mana shu kasallikka qarshi 2 yildan beri ishlab kelayotgan Koronavirusga qarshi kurash shtabi a’zosi sifatida 7 oy muddat asossiz yozilgan, deb bemalol ayta olaman. Chunki antitanalar paydo bo‘lishi, ularning qancha muddat saqlanishi faqat O‘zbekistonda emas, o‘ylaymanki, butun dunyoda o‘rganilmoqda. Hech qaysi ilmiy tekshirish instituti yoki ilmiy markaz tomonidan aniq, ilmiy asoslangan isbot hozirgi kungacha yo‘q”, — deydi Botir Qurbonov.

Uning so‘zlariga ko‘ra, bu jarayon har bir kishida individual kechmoqda. Butun dunyo olimlari buni kuzatmoqda va ilmiy izlanishlar davom etmoqda. O‘zbekistonda ham bugungi kunda bir necha o‘nlab olimlar tomonidan koronavirusga qarshi ilmiy izlanishlar olib borilmoqda.

O‘zbekistonda 2020-yildan boshlab kasallikdan keyingi immunitet shakllanishi SSV, xususan, Virusologiya ilmiy-tekshirish instituti tomonidan o‘rganilgan bo‘lib, 2020-yilning 27-avgustidan 11-sentabrigacha ushbu antitanalarning paydo bo‘lishi va saqlanishi respublikadagi 86 879 kishida o‘rganilgan. Ularning 23 foizida, ya’ni 19 869 nafarida antitanalar shakllanganligi ko‘rib chiqilgan. Ushbu antitanachalar aniqlangan viloyatlarda 38 foizgacha jamoaviy immunitet shakllanganligi, ayrim viloyatlarda ushbu ko‘rsatkich pastligi yoki 5 foizgacha shakllanganligi qayd etilgan.

“Ushbu kasallikdan keyingi immunitet shakllanishi va uning yo‘q bo‘lib ketishi barcha ilmiy tekshirish institutlari uchun, qolaversa, vaksina ishlab chiqaruvchilar uchun mavhumligicha qolmoqda”, — degan Koronavirusga qarshi kurashish shtabi a’zosi.

Azizbek Boltayev butun dunyo mamlakatlari kabi O‘zbekiston ham shoshilinch ravishda aholini koronavirusga qarshi emlashi kerakligini, mamlakat bu borada boshqa mamlakatlardan ortda qolayotganini aytgandi.

Bunga javoban Botir Qurbonov O‘zbekistonda koronavirusga qarshi emlash 2020-yildan boshlangani va u bosqichma-bosqich amalga oshirilib kelinayotganini, 3,5 milliondan ortiq shaxs vaksina bilan emlanganini ta’kidladi (SSV ma’lumotlarida 22-iyun holatiga ko‘ra mamlakatda jami emlanganlar soni 1 784 553 kishini tashkil etmoqda).

Azizbek Boltayev koronavirus bo‘yicha hukumat komissiyasi boshchiligidagi Sog‘liqni saqlash vazirligiga pandemiyaga qarshi choralarni yomon tashkil etgani, o‘tgan yilgi qiyinchiliklardan tegishli xulosa chiqarmagani, shuningdek, vaksinatsiya kampaniyasini ochiqchasiga zaif tashkillashtirayotgani uchun ikki baho berilishi kerakligini ham aytgandi.

Koronavirusga qarshi kurashish shtabi a’zosining so‘zlariga ko‘ra, may oyida 1037 ta emlash punktida 3 035 784 doza vaksina bilan aholi qabrab olingan (SSV ma’lumotlarida 22-iyun holatiga ko‘ra shuncha dozadan foydalanilgani qayd etilgan). Iyun oyining boshlarida esa emlash puntklari 1883 taga ortishi va bir oyda aholini 1,2 millionta doza bilan emlash ko‘zda tutilgan.

Botir Qurbonovning ma’lum qilishicha, bugungi kunda xavf guruhiga kiruvchi aholining vaksinatsiya bilan qamrab olinganlik darajasi quyidagicha:

• 65 yosh va undan kattalar — 37 foiz;
• tibbiyot xodimlari — 96 foiz;
• umumta’lim maktabi o‘qituvchilari — 61,5 foiz;
• maktabgacha ta’lim tashkilotlari xodimlari — 67 foiz;
• surunkali kasalliklari bor kishilar — 40 foiz;
• huquqni muhofaza qiluvchi organlar xodimlari — 60 foiz.

“O‘zbekistonda ham boshqa rivojlangan va rivojlanayotgan davlatlar singari aholining xavf guruhiga kiruvchi qismi 40 foizdan 95 foizgacha vaksinatsiya bilan qamrab olindi. Ya’ni ushbu qatlamda epidemiyaning aholiga keng tarqalishining oldini olish bo‘yicha maxsus choralar ko‘rilgan”, — degan Sanitariya-epidemiologik osoyishtalik va jamoat salomatligi xizmati boshlig‘i o‘rinbosari Botir Qurbonov va keltirib o‘tilgan ma’lumotlardan kimga qanday baho berilishi ayon bo‘lishini ta’kidlagan.

“Yil oxirigacha va’da qilganimizdek, 20 foiz aholining emlanishini tashkil qilish va buning uchun yetakchi vaksina ishlab chiqaruvchi tashkilotlar, korxonalar bilan muzokaralar olib borilishi va tegishli xulosalar chiqarilishi oldimizda qo‘yilgan vazifamizdir”, — degan Botir Qurbonov va Koronavirusga qarshi maxsus komissiya ishi to‘g‘ri tashkil etilmaganida O‘zbekistonda ham boshqa davlatlar, xususan, AQSh, Germaniya, Buyuk Britaniya va Rossiya qatori mamlakatlarda koronavirus bilan bo‘liq vaziyat hozirgi holatidan birmuncha yomonroq bo‘lishi mumkinligini ham aytib o‘tgan.