Namangan viloyatining To‘raqo‘rg‘on tumanidagi “Sohilobod” mahallasida yashovchi A.R. xonadonida 2021-yil 23-iyun kuni yong‘in sodir bo‘ldi. Bu haqda “Daryo” muxbiri Azizbek Abduvaliyev xabar bermoqda.
Hodisa oqibatida yashash uyining shift va pol qismidan 30 kvadrat metr qismi hamda uy-ro‘zg‘or buyumlari yonib ketdi. Xonadon egalari farzandi, 2009-yilda tug‘ilgan A.M. voqea joyida halok bo‘ldi.
Dastlabki surishtiruvlarga ko‘ra, xonadon egalari suyultirilgan gaz ballonidan foydalanish qoidalariga rioya etmagan. Uy yerto‘lasidan oshxona sifatida foydalanilgan, bu yerda mo‘ri yoki havo almashtirish moslamasi bo‘lmagan.
Oshxonaga choy qaynatish uchun kirgan o‘smir olov yoqqanda portlash ro‘y bergan.
Hozirda mazkur holat yuzasidan tergovga qadar surishtiruv harakatlari olib borilmoqda.
Tuman hokimligi axborot xizmatining ma’lum qilishicha, tuman hokimligi va tuman favqulodda vaziyatlar bo‘limi kelgusida bu kabi fojialarga yo‘l qo‘ymaslik maqsadida mahalla raislari va fuqarolar ishtirokida tushuntirish ishlarini olib bormoqda.
Mavzuga doir: Nukusdagi restoranlarning birida gaz portladi
Izoh (0)