Ўзбекистон Ташқи ишлар вазири Абдулазиз Комилов 2021 йилнинг 24 июнь куни мамлакатдаги дипломатик миссияси якунланаётган Германиянинг Фавқулодда ва мухтор элчиси Гюнтер Оверфелдни қабул қилди. Бу ҳақда вазирлик матбуот хизмати хабар қилди.
Ўзбекистон ташқи сиёсат идораси раҳбари Германия элчисининг икки томонлама муносабатларни сифат жиҳатидан янги босқичга кўтариш бўйича фаолиятини юқори баҳолади. Хусусан, 2019 йилда давлатлар раҳбарларининг ўзаро ташрифлари ва 2021 йил март ойида Ўзбекистон Президенти Шавкат Мирзиёев ва Германия федерал канцлери Ангела Меркель ўртасидаги онлайн музокаралар давомида эришилган келишувларни амалга оширишни давом эттиришнинг муҳимлиги қайд этилди.
Томонларнинг сиёсий, савдо-иқтисодий, инвестициявий ва маданий-гуманитар соҳаларда ҳамкорликни янада мустаҳкамлашга тайёр эканлиги тасдиқланди.
Г.Оверфелд, ўз навбатида, унинг Ўзбекистонда муваффақиятли фаолият юритишида кўрсатилган кўмак ва яратилган шароитлар учун миннатдорлик билдирди.
Бундан аввал Ташқи ишлар вазирлиги Ўзбекистонда махфий биологик қурол ишлаб чиқарилаётганини рад этгани, Абдулазиз Комилов Анталияда Покистон ташқи ишлар вазири Шоҳ Маҳмуд Қурайший билан учрашгани ҳамда Тожикистоннинг Ўзбекистондаги янги элчиси тайинлангани ҳақида хабар берилганди.
Изоҳ (0)