AQShda marixuanaga ruxsat berilishi yo‘llarda avariyalar sonining ortishiga olib kelgani ma’lum bo‘ldi

Yangi tadqiqot natijalariga ko‘ra, AQShning marixuana iste’moliga ruxsat berilgan shtatlarida so‘nggi 10 yil ichida o‘lim bilan bog‘liq yo‘l-transport hodisalari soni ortgan, deb xabar beradi Motor.

Mamlakatda marixuana iste’moli va savdosiga rekreatsion maqsadlarda ruxsat beruvchi shtatlar soni ortib borayotgani sabab Yo‘l xavfsizligi sug‘urta instituti (IIHS) bu yo‘llardagi xavfsizlikka qanchalik ta’sir ko‘rsatganini o‘rganishga qaror qilgan. Ekspertlar 10 yillik — 2009-yildan 2019-yilga qadar bo‘lgan ma’lumotlarni tahlil qilib chiqqan.

25 varaqli hisobotda marixuana ruxsat berilgan shtatlarda qonunan taqiqlangan shtatlarga qaraganda jarohat olish yoki o‘lim bilan bog‘liq avariyalar soni ko‘pligi ko‘rsatilgan. Xulosaga ko‘ra, marixuanaga qonunan ruxsat berilgan shtatlarda jarohat olganlar bilan bog‘liq yo‘l-transport hodisalari o‘rtacha 6,6 foizga ko‘proq sodir bo‘lmoqda. Shuningdek, ushbu shtatlarda o‘lim bilan bog‘liq avariyalar o‘rtacha 2,3 foizga ortgan.

Marixuana savdosi chakana savdo turiga aylangan shtatlardagi statistika esa bundan ham xavotirli: IIHS mutaxassislari jabrlanuvchilar bilan bog‘liq avariyalar 5,6 foizga, o‘lim bilan bog‘liq YTHlar esa 3,8 foizga oshganini qayd etgan. Umuman olganda, tadqiqotda ta’kidlanishicha, giyohvand moddalarga bog‘liq bo‘lmagan boshqa omillar ham ushbu natijalarga ta’sir ko‘rsatgan bo‘lishi mumkin. Ayni vaqtda AQShning 11 ta shtatida va Kolumbiya okrugida marixuanadan rekreatsion maqsadlarda foydalanishga ruxsat berilgan.

Avvalroq BMTning Giyohvandlik vositalari bo‘yicha komissiyasi tibbiyot marixuanasi hamda uning hosilasini dunyodagi eng xavfli giyohvand moddalar toifasidan chiqarib tashlash bo‘yicha qaror qabul qilgan edi.