BMT marixuanani xavfli giyohvandlik moddalari ro‘yxatidan chiqarib tashladi
BMTning Giyohvandlik vositalari bo‘yicha komissiyasi tibbiyot marixuanasi hamda uning hosilasini dunyodagi eng xavfli giyohvand moddalar toifasidan chiqarib tashlash bo‘yicha qaror qabul qildi, deb xabar beradi Meduza.
Komissiyaga a’zo 53 davlatdan 27 tasi, jumladan, AQSh va Yevropa Ittifoqi mamlakatlari qarorni ma’qullagan bo‘lsa, Rossiya va Xitoy kabi 25 ta davlat bunga qarshi ovoz bergan, birgina Ukraina betaraf qolgan.
BMT komissiyasining bayonotiga ko‘ra, tibbiyot kannabisi 1961-yilda tuzilgan Giyohvandlik vositalari to‘g‘risidagi yagona konvensiyaning IV ro‘yxatidan chiqarilgan. Ushbu modda bugungi kunga qadar geroin kabi kuchli tobelikni keltirib chiqaruvchi xavfli giyohvand moddalar bilan bir qatorda turgan edi. Mazkur qaror Jahon sog‘liqni saqlash tashkilotining 2019-yil yanvardagi tavsiyasi asosida qabul qilingan.
Shu bilan birga, marixuana Giyohvandlik vositalari to‘g‘risidagi yagona konvensiyaning I ro‘yxatida qolgan, ya’ni u barcha giyohvand moddalar kabi nazorat ostida bo‘ladi.
Ta’kidlanishicha, ushbu qaror kannabisdan tibbiyot maqsadlarida foydalanish va tadqiqotlar o‘tkazishda ijobiy natija beradi. Ekspertlarning hisoblashicha, BMT qarori xalqaro nazoratning tezda susayishiga sabab bo‘lmaydi.
Avvalroq Buxoroda AQSh kompaniyasi bilan birgalikda kannabis yetishtirish klasteri tashkil etilishi mumkinligi to‘g‘risida xabar berilgandi.
Mavzuga doir: Yangi Zelandiya referendumda evtanaziyani ma’qulladi va marixuana qonuniylashtirilishiga qarshi chiqdi
