Йирик кўчмас мулк объектларини хусусийлаштириш жараёнлари бўйича Давлат тендер комиссиясининг қарори қабул қилинди. Бу ҳақда Давлат активларини бошқариш агентлиги матбуот хизмати хабар берди.
Унга кўра Тошкент шаҳри Сайилгоҳ кўчаси манзилида жойлашган собиқ «Марказий бино» 210 миллиард сўм сотиб олиш нархи билан Metropol Group МЧЖга сотилган.
«Gazeta.uz»нинг ёзишича, ер участкасининг умумий майдони 2,2 гектар, бино ва иншоотларнинг майдони 40 243 квадрат метр, бино майдони — 9376 квадрат метр, коммуникация тармоқлари (сув, газ, электр, иссиқлик) мавжуд.
Мазкур объектдан келгусида офис, савдо, савдо-кўнгилочар, маданий-хордиқ, спорт, туристик ва бошқа хизматлар кўрсатиш фаолияти йўналишларидан бири ёки бир нечтасини амалга оширилиши талаб этилиши кўзда тутилган.Февраль ойи охирида пойтахтда Тошкент амалий фанлар университети ва Diplomat university очилиши кутилаётгани ва уларни бир неча йилга барча турдаги солиқлардан озод қилиш мумкинлиги маълум бўлган эди. Биринчи университет Юнусобод туманида, иккинчиси Мирободда (тахминан, Давлат хавфсизлик хизматининг собиқ биносида) жойлашган бўлиши керак.
Metropol Group компанияси ҳақида
КТЯДР маълумотларига кўра, Metropol Group 2021 йил 23 февралда Тошкент шаҳрида рўйхатдан ўтган. Кўрсатилган асосий фаолият — тижорат фаолияти ва менежмент бўйича консалтинг. Таъсисчиси — Дониёр Абдулазизович Комилов, раҳбари — Якушевич Георгий Игоревич.
Таъкидланишича, Дониёр Абдулазизович Комилов — Ўзбекистон ташқи ишлар вазири Абдулазиз Комиловнинг ўғли.
Rusprofile маълумотларига асосан, Дониёр Комилов Россияда «Селена» ва КЦ компаниялари таъсисчиларига киради. «Коммерсантъ» 2010−2014 йилларда у «Газпромбанк» — ЗАО тузилмасидаги «Управляюшая компания — Стратегические активи»ни бошқаргани ҳақида ёзган.
Эслатиб ўтамиз, Давлат хавфсизлик хизмати (ДХХ)нинг Тошкентдаги Сайилгоҳ кўчасида жойлашган собиқ марказий биноси ҳудуди хусусий секторга сотилиши ҳақида 2020 йилнинг октябрида хабар берилган эди. 2021 йилнинг май ойида уни сотиб олиш бўйича 3 та таклиф келиб тушгани маълум бўлганди.
Изоҳ (0)