Namanganda umumta’lim muassasalarini 2020/2021-o‘quv yilida tamomlayotgan o‘quvchilarning 563 nafari muddatidan avval xorijiy davlatlaridagi nufuzli oliy ta’lim muassasalari talabaligiga qabul qilindi. Bu haqda “Daryo” muxbiri Azizbek Abduvaliyev xabar bermoqda.
Bu borada Yangiqo‘rg‘on tumani o‘quvchilari yaqqol yetakchilik qilmoqda. Bu tumanda 131 nafar yoki xorijga muddatidan avval o‘qishga kirgan namanganlik o‘quvchilarning chorak qismi istiqomat qilmoqda.
O‘ziga xos reytingdagi keyingi o‘rinni Mingbuloq tumani egallagan — 101 nafar. Qiziq tomoni, ularning yarmidan ortig‘ini tumandagi 13-davlat ixtisoslashtirilgan maktab-internati o‘quvchilari tashkil etadi. Jumladan, ushbu DIMI o‘quvchisi Elbek Rahimov xorijdagi 17 ta, Zufarbek Valijonov esa 11 ta OTMga o‘qishga kirgan.
Viloyat xalq ta’limi boshqarmasi axborot xizmatiga ko‘ra, namanganlik o‘quvchi-yoshlarni talabalikka qabul qilganlar safida AQSh, Yaponiya, Janubiy Koreya, Rossiya, BAA, Saudiya Arabistoni, Polsha, Avstraliya, Kipr kabi o‘nlab davlatlardagi oliy ta’lim muassasalari bor.
Izoh (0)