2020-yilning avgustida Google zilzilalar haqida oldindan ogohlantirish funksiyasini taqdim etgan edi. U Kaliforniyada sinovdan o‘tkazilgan va keyinchalik Yangi Zelandiya va Gretsiyada ishga tushirilgan. Spot’ning kompaniyaga tayanib yozishicha, funksiyaga yana yettita mamlakat, jumladan, O‘zbekiston ham qo‘shilgan. Kelajakda mazkur funksiyadan butun dunyo aholisi foydalanishi mumkin bo‘ladi.
Bu nima va nima uchun kerak?
Tabiiy ofat yoki favqulodda holat vaqtida har bir soniyada qadrli. Masalan, tadqiqotlarning ko‘rsatishicha, foydalanuvchilar zilzila bo‘lishi haqida oldindan ogohlantirish olsa va ularda xavfsiz joyga yetib olish uchun yetarlicha vaqt bo‘lsa, olingan jarohatlarni 50 foizdan ortiqqa kamaytirish mumkin.
2020-yilda Google Android qurilmalari asosidagi texnologiya yordamida butun dunyoda zilzilani aniqlovchi yirik tarmoqni yaratishga kirishgan edi.
Smartfonlarning barchasi zilziladan ogohlantiruvchi signallarni aniqlaydigan mitti akselerometrlar bilan jihozlangan. Agarda telefon zilzilaga o‘xshash biror nimani aniqlaydigan bo‘lsa, u yerosti silkinishining taxminiy joyiga oid signalni kompaniya serveriga yuboradi.
Server ko‘plab telefonlardagi ma’lumotlarni birlashtirib, rostdan ham zilzila bo‘lgan-bo‘lmaganini aniqlaydi va zarurat tug‘ilganida mintaqadagi barcha foydalanuvchilarga xabarnoma jo‘natadi.
Funksiya qanday yoqiladi yoki o‘chiriladi?
Smartfonning “Sozlamalar” bo‘limiga kirib, quyidagi ketma-ketlik amalga oshiriladi: Location>Advanced>Eartquake Alerts. Android’ning so‘nggi yangilanishi talab etiladi. Ushbu ogohlantirishni olishni istamagan foydalanuvchi xuddi shu sozlamalar orqali o‘chirib qo‘yishi mumkin.
Izoh (0)