2020 йилнинг августида Google зилзилалар ҳақида олдиндан огоҳлантириш функциясини тақдим этган эди. У Калифорнияда синовдан ўтказилган ва кейинчалик Янги Зеландия ва Грецияда ишга туширилган. Spot’нинг компанияга таяниб ёзишича, функцияга яна еттита мамлакат, жумладан, Ўзбекистон ҳам қўшилган. Келажакда мазкур функциядан бутун дунё аҳолиси фойдаланиши мумкин бўлади.
Бу нима ва нима учун керак?
Табиий офат ёки фавқулодда ҳолат вақтида ҳар бир сонияда қадрли. Масалан, тадқиқотларнинг кўрсатишича, фойдаланувчилар зилзила бўлиши ҳақида олдиндан огоҳлантириш олса ва уларда хавфсиз жойга етиб олиш учун етарлича вақт бўлса, олинган жароҳатларни 50 фоиздан ортиққа камайтириш мумкин.
2020 йилда Google Android қурилмалари асосидаги технология ёрдамида бутун дунёда зилзилани аниқловчи йирик тармоқни яратишга киришган эди.
Смартфонларнинг барчаси зилзиладан огоҳлантирувчи сигналларни аниқлайдиган митти акселерометрлар билан жиҳозланган. Агарда телефон зилзилага ўхшаш бирор нимани аниқлайдиган бўлса, у ерости силкинишининг тахминий жойига оид сигнални компания серверига юборади.
Сервер кўплаб телефонлардаги маълумотларни бирлаштириб, ростдан ҳам зилзила бўлган-бўлмаганини аниқлайди ва зарурат туғилганида минтақадаги барча фойдаланувчиларга хабарнома жўнатади.
Функция қандай ёқилади ёки ўчирилади?
Смартфоннинг «Созламалар» бўлимига кириб, қуйидаги кетма-кетлик амалга оширилади: Location>Advanced>Eartquake Alerts. Android’нинг сўнгги янгиланиши талаб этилади. Ушбу огоҳлантиришни олишни истамаган фойдаланувчи худди шу созламалар орқали ўчириб қўйиши мумкин.
Изоҳ (0)