O‘zbekistonda Sardoba toshqini haqida hujjatli film suratga olinmoqda

O‘zbekiston kinematografiyasi agentligi buyurtmasiga binoan “Hujjatli va xronikal filmlar kinostudiyasi” DUK tomonidan “Sardoba sabog‘i” hujjatli film suratga olinmoqda. Bu haqda agentlik matbuot xizmati xabar berdi.

Mazkur film 2020-yilning 1-may kuni Sirdaryo viloyati hududidagi Sardoba suv omborida yuzaga kelgan texnogen ofat haqida.

Qayd etilishicha, filmning suratga olish ishlari Sirdaryo viloyatining Sardoba, Mirzaobod va Oqoltin tumanlarida bo‘lib o‘tmoqda. Filmda evakuatsiya qilingan aholi vakillari, ular joylashgan hududlar, aholini evakuatsiya qilish jarayonida ishtirok etgan harbiy xizmatchilar, qutqaruvchilar hamda talafotda jabr ko‘rganlarga yordam bergan fuqarolar haqida hikoya qilinadi.

“Filmdan ko‘zlangan maqsad yurtdoshlarimiz boshiga tushgan shunday sinovli kunlarni sabr va bardosh, kuchli iroda, birdamlik, hamjihatlik bilan yengib o‘tishga qaratilgan. Va albatta, yuz bergan fojia hammamiz uchun saboq bo‘lishi filmning bosh g‘oyasi hisoblanadi. “Sardoba sabog‘i” Kinematografiya agentligidagi ilk rejissorlik ishim bo‘lgani uchun film tomoshabinlarga manzur bo‘lishini ko‘zlab harakat qilyapmiz. Bu jarayonlarda ustozlar va tajribali hamkasblarimiz o‘zlarining maslahatlarini berib kelishyapti”, — degan film rejissori Abdusamad Salomov.

Eslatib o‘tamiz, 2020-yilning 1-may kuni O‘zbekiston tarixidagi eng yirik texnogen falokatlardan biri — Sardoba suv omborining to‘g‘oni yorilishi yuz bergan edi. Oqibatda o‘n minglab odamlar evakuatsiya qilingan, minglab suv ostida qolgan, qo‘shni Qozog‘istonning janubiy tumanlarida ham toshqinlar kelib chiqqan edi.