Namanganda voyaga yetmagan qiziga tegajog‘lik qilmoqchi bo‘lgan erini bolta bilan urib o‘ldirgan ayolga sud hukmi o‘qildi. Bu haqda “Xalq so‘zi online” xabar berdi.

Ma’lum qilinishicha, sudlanuvchi ayol R.X. 2006-yilda fuqaro A.K. bilan tanishib, u bilan shar’iy nikohdan o‘tgan holda yashab kelgan. Oilada farzand tug‘ilgandan so‘ng 2010-yilda nikoh rasmiylashtirilgan.

2021-yilning 31-yanvaridan 1-fevralga o‘tar kechasi A.K. spirtli ichimlikdan mast holda uyga kelib, yashash xonasida uxlab yotgan 2010-yilda tug‘ilgan qizi, voyaga yetmagan B.G.ning kiyimlarini yechib, tegajog‘lik qilmoqchi bo‘lgan. Shu payt kichik farzandining yig‘isidan uyg‘onib ketgan xotini undan nima qilayotganini so‘raganida er nosqovog‘ini qidirayotganini aytib, yana joyiga yotib olgan.

Bundan qattiq ta’sirlangan R.X. g‘azablanib, spirtli ichimlik ta’sirida uxlab qolgan erining ojiz ahvoldaligidan foydalanib, hovlida bo‘lgan bolta bilan uning bosh sohasiga bir necha marotaba urib, qasddan o‘ldirgan.

Sodir etgan jinoyati izlarini yashirish maqsadida uning murdasini yashash uyidagi foydalanilmay kelinayotgan xonaga olib kirib, uch kun saqlagan. 3-fevral kuni tungi soat 03:30 larda jasadni hovlidagi bodom daraxtining oldiga sudrab olib chiqib, qon teggan gilam va matolarni boshqa xonaga olib kirib, yashirib qo‘ygan.

Shundan keyin qo‘shni uyda yashovchi qaynakasi Q.A.ga bodom daraxti tagida kimdir yotganini aytib, uni uyidan chaqirib chiqqan. Q.A. daraxt tagiga borib qo‘l telefoni yorug‘ida ukasining o‘lib yotganini ko‘rgach, tez tibbiy yordamga qo‘ng‘iroq qilgan.

Dastlab R.X. turmush o‘rtog‘ini o‘ldirib qo‘yganini aytmasdan, go‘yoki marhum o‘z ehtiyotsizligi sababli vafot etganday qilib ko‘rsatgan. Oradan 2-3 soat vaqt o‘tgach, IIB xodimlari kelib, qaytadan suhbatlashganda bo‘lgan holatni ochiq-oydin so‘zlab bergan. Shundan keyin unga nisbatan Jinoyat ishi ochilib, tergov harakatlari olib borilgan.

Ushbu jinoyat ishini ko‘rib chiqqan viloyat sudi ayolga nisbatan Jinoyat kodeksining tegishli moddalari bilan 10 yil-u 6 oy muddatga ozodlikdan mahrum etish jazosini tayinlagan.