Toshkent shahrining Sergeli tumanida yoshlar festivali o‘tkazilishi munosabati bilan 12-iyun kuni ayrim ko‘chalarda avtomobillar harakati vaqtincha cheklanadi. Bu haqda tuman hokimligi matbuot xizmati xabar berdi.
Ma’lum qilinishicha, tumanning Mehrigiyo ko‘chasida joylashgan avtoturargoh hududida Yoshlar oyligi doirasida yoshlar festivali o‘tkaziladi. Shu munosabat bilan 12-iyun kuni soat 18:00 dan 22:00 gacha Mehrigiyo ko‘chasining Jahonaro ko‘chasi kesishmasidan Mirzo Tursunzoda ko‘chasi kesishmasigacha bo‘lgan qismida avtomobillar harakati vaqtincha cheklanadi.
Vujudga kelishi mumkin bo‘lgan tirbandliklarning oldini olish maqsadida haydovchilarga boshqa aylanma yo‘llardan foydalanish tavsiya etiladi.
Tuman hokimligi yuzaga keladigan noqulayliklar uchun uzr so‘raydi.
Avvalroq havo harorati ko‘tarilgani sabab Toshkent yerusti metrosida poyezdlar harakat tezligi cheklangani, Toshkentdagi qator ko‘chalarda transport harakati 30 kunga cheklangani hamda Toshkent viloyatidagi Keles ko‘prigi “ta’mirlash ishlari yakunlanguniga qadar” yopilgani haqida xabar berilgandi.
Izoh (0)