O‘zbekistonda oyina.uz nomli ma’naviy portal ishga tushishi kutilmoqda. Bu haqda 10-iyun, payshanba kuni o‘tkazilgan “Ma’naviyat festivali” matbuot anjumanida Respublika ma’naviyat va ma’rifat markazi rahbari Minhojiddin Hojimatov ma’lum qildi, deya xabar bermoqda “Daryo” muxbiri.
“Biz qisqa yillar ichida shu darajada katta o‘zgarishlarga erishyapmizki, to‘g‘risi, buni hisob-kitob, tahlil qilib, jamlab ulgurmayapmiz. Lekin shunday bir ulug‘ g‘oyalarni, niyatlarni, maqsadlarni obro‘sizlantirishga urinadigan holatlarning borligi insonning yuragini og‘ritadi. Biz juda qiyin tiklanish jarayonlaridan o‘tdik, endi Xudo nasib qilsa, yuksalish davriga kiryapmiz. Uchinchi renessans poydevorini yaratish, degan so‘zning tagida avvalgi ikkita renessansning ham ildizi yotibdi. Uni ham mana shu elning, shu yurtning, shu millatning buyuk daholari amalga oshirgan, degan juda katta e’tirof turibdi. Eng muhimi, qadamlarimiz, intilishlarimiz, mezonlarimiz, o‘lchovlarimiz, maqsadlarimiz shunga munosib bo‘lsin.
Mustaqilligimizning 30 yilligi arafasida bo‘ladigan “Ma’naviyat festivali” butunlay o‘zgacha o‘tishi kerak. Har bitta yurakka, har bitta qalbga, har bitta xonadonga festivalning nuri, tafti kirib borishi lozim. Bu taftni birinchi navbatda bizning hurmatli olimlarimiz, adabiyot, san’at vakillari, shu yurtning fidoyisi bo‘lgan ziyolilarimiz olib kiradi”, — dedi Hojimatov.
U o‘z nutqida O‘zbekistonda amalga oshirilayotgan ma’naviy islohotlarga to‘xtalarkan, yaqin kunlarda bu borada qilinadigan ishlar xususida ham gapirdi.
“Kuni kecha Ijtimoiy-ma’naviy tadqiqotlar institutini tashkil qilish bo‘yicha qaror chiqdi. Yaqinda oyina.uz nomli ma’naviy portalni ishga tushirmoqchimiz. Shuningdek, yangi media markaz ham to‘laqonli ish boshlash arafasida turibdi”, — dedi Respublika ma’naviyat va ma’rifat markazi rahbari.
Izoh (0)