“O‘ztemiryo‘lyo‘lovchi” bosh direktori va uning o‘rinbosarlari barcha yo‘nalishlardagi yo‘lovchi poyezdlarida tekshiruv safarlarini boshladi

11-iyun kuni “O‘ztemiryo‘lyo‘lovchi” AJ bosh direktori va uning o‘rinbosarlari barcha yo‘nalishlardagi yo‘lovchi poyezdlarida tekshiruv safarlarini boshladi. Bu haqda Transport vazirligi matbuot xizmati xabar berdi.

Bosh direktor boshchiligidagi ishchi guruh Toshkent—Andijon—Toshkent yo‘nalishidagi 60/61-sonli yo‘lovchi poyezdida nazorat ishlarini olib borgan. Toshkentdan Andijongacha barcha vagonlardagi konditsionerlarning ishlashi, vagon kuzatuvchilarining faoliyatlari nazorat qilib borilgan.

Bundan tashqari, shu kunning o‘zidan boshlab yo‘l davomida yo‘lovchilarga o‘z vaqtida birinchi tibbiy yordam ko‘rsatish maqsadida har bir yo‘lovchi poyezdlar tarkibiga tibbiyot xodimlari biriktirilgan. Ta’kidlanishicha, poyezdlarda tibbiyot xodimlari bilan bunday amaliyot boshqa mamlakatlarda qo‘llanilmaydi.

Avvalroq “O‘zbekiston temir yo‘llari” AJ matbuot xizmati shu kunlarda ijtimoiy tarmoqlarda yo‘lovchi tashish vagonlariga konditsionerlar o‘rnatish masalasi ko‘p muhokamalarga sabab bo‘layotgani yuzasidan komissiya tuzilganini ma’lum qilgandi.