Farg‘onada ko‘p qavatli uydagi xonadonlarning birida yong‘in kelib chiqdi, o‘t ikki xonadonga ham o‘tib ketdi. Bu haqda “Daryo” muxbiri Azizjon Ermatov xabar berdi.
Viloyat Favqulodda vaziyatlar boshqarmasi axborot xizmatining aniqlashtirishicha, 2021-yilning 7-iyun kuni soat 10:05 da Farg‘ona shahar “Bobur” MFY Abdulla Qodiriy ko‘chasida joylashgan 28-uyning 62-xonadonida yong‘in bo‘layotgani haqida xabar kelib tushgan.
Yong‘in joyiga maxsus bo‘linmalar soat 10:15 da, ya’ni 10 daqiqada yetib borgan va soat 10:30 da yong‘in to‘liq bartaraf etilgan.
Qayd etilishicha, yong‘in oqibatida 62-xonadon balkonining 8 kvadrat metr qismidagi uy jihozlari yonib ketgan. Shuningdek, yong‘in yuqori qavatlardagi yana ikki xonadonga ham tarqalgan. Oqibatda 66 va 70-xonadonlarning balkonlari ham zarar ko‘rgan. Yong‘indan uylarning 120 kvadrat metr maydoni saqlab qolingan.
Yong‘in qutqaruvchilari tomonidan 6 nafar fuqaro qutqarilgan va tez tibbiy yordam xizmatiga yetkazilgan.
Favqulodda vaziyatlar boshqarmasi axborot xizmatining qo‘shimcha qilishicha, yong‘inda kuyish, tan jarohati va halok bo‘lish holatlari bo‘lmagan. Hozirda yong‘in sababi va moddiy zarar miqdori aniqlanmoqda.
Izoh (0)