Prezident Shavkat Mirziyoyev 8-iyun kuni madaniyat va ma’rifat sohalariga oid loyihalar taqdimoti bilan tanishgandi. Loyihalar orasida Alisher Navoiy nomidagi Milliy bog‘ hududida barpo etiladigan kutubxona ham bor.
Loyihaga ko‘ra, kutubxona uch qavatdan iborat bo‘lib, unga tutash hududda yashil hudud yaratiladi.
Birinchi qavatda badiiy va axborot texnologiyalari bo‘yicha adabiyotlar, ikkinchi qavatda tarixiy-filologik adabiyotlar, diniy kitoblar, uchinchi qavatda gumanitar fanlar bo‘yicha adabiyotlar joylashtiriladi.
“O‘zbekiston 24” telekanali namoyish etgan taqdimotga videosida, kutubxonaning birinchi qavatida Alisher Navoiy haykali o‘rnatilganini ko‘rish mumkin.
Kutubxona fondi 1,5 milliondan ziyod kitobni, shu jumladan, elektron nashrlar va fanning turli sohalaridagi hujjatlarni tashkil etadi.
Shavkat Mirziyoyev kutubxonani qurishda “shaharsozlikning ilg‘or tajribalarini qo‘llash, keluvchilarga qulay sharoitlar yaratish zarurligini” ta’kidlagan.
Toshkent shahar hokimi Jahongir Ortiqxo‘jayev o‘tkazgan taqdimotga ko‘ra, kutubxonaga “prezident” maqomi berilgan.
Eslatib o‘tamiz, 9-aprel kuni ijtimoiy tarmoqlarda Toshkentning Chilonzor tumanida joylashgan “Navro‘z” to‘yxonasi binosi buzilgani to‘g‘risida xabarlar tarqaldi. Buzilish ishlariga izoh bergan Toshkent shahar hokimligining ma’lum qilishicha, bino buzilgan hududda Alisher Navoiy nomidagi ijod maktabi, Alisher Navoiy nomidagi adabiyot muzeyining yangi binosi, yangi Milliy drama teatr binosi, mashhur yaponiyalik arxitektor Tadao Ando loyihasi asosida davlat san’at muzeyining namoyishlari kompleksini qurish boshlangan.Shuningdek, Toshkentdagi “Xalqlar do‘stligi” san’at saroyi, Abulqosim Eshon madrasasi, Milliy bog‘dagi eski amfiteatr va avvalroq “snos” qilingan “Navro‘z” to‘yxonasi oralig‘idagi favvora buzib tashlangan.
Izoh (0)