Buxoro viloyat IIB JQBB Giyohvandlik vositalari bilan qonunga xilof ravishda muomala qilishga qarshi kurashish boshqarmasi tomonidan 2021-yilning 28-may kuni tadbir o‘tkazilgan. Bu haqda viloyat IIB axborot xizmati rahbari Shuhrat Jalolov “Daryo”ga ma’lum qildi.
Bildirilishicha, 28-may kuni viloyat IIBga Romitan tumanida yashovchi fuqaroning giyohvand modda iste’mol qilishi va uyini bangixonaga aylantirib yuborgani to‘g‘risida ma’lumot kelib tushgan. Unga ko‘ra, Romitan tumani Gazli shahrida yashovchi 39 yoshli fuqaro A.D.ning yashash xonadoni borib o‘rganilgan. Haqiqatan ham ushbu xonadonda iste’mol qilish maqsadida sof og‘irligi 3,51 gramm bo‘lgan oq rangli sellofan paketga o‘ralgan marixuana giyohvand moddasi mavjudligi aniqlangan.Bundan tashqari, fuqaro ikki dona oq rangli yelim idishlarda ikki tup kannabis o‘simligini ham yetishtirib, parvarishlab kelayotgani ma’lum bo‘lgan. A.D. o‘zining jinoiy sheriklari bilan o‘z uyida bangixona tashkil qilib, birgalikda giyohvand moddalarni iste’mol qilib kelgan. Shuningdek, endigina maxsus tayyorlangan bir dona 0,5 litr hajmdagi yelim suv idishi ham xolislar ishtirokida tegishli tartibda hujjatlashtirib olingan.
A.D. bilan surishtiruv ishlari olib borilganda, unga marixuana giyohvand moddasini 2021-yilning 24-may kuni Peshku tumani “Shavgon” mahallasida yashovchi tanishi 42 yoshli fuqaro X.Sh. sotgani aniqlangan. Tezkor tadbir davomida fuqaro X.Sh.ning ham yashash uyi ko‘zdan kechirilgan. Ushbu jarayonda X.Sh. o‘z tomorqa yerida besh tup kannabis o‘simligini yetishtirayotgani, shuningdek, hovlisining molxonasida bir dona kulrang rangli qopga solingan, sof og‘irligi 323 gramni tashkil etuvchi marixuana giyohvand moddasini sotish maqsadini ko‘zlab, saqlab kelayotgani ma’lum bo‘lgan.
Holat yuzasidan fuqarolar A.D. va X.Sh.ga nisbatan Jinoyat kodeksning 270-moddasi 1-qismi (taqiqlangan ekinlarni yetishtirish), 273-moddasi (giyovandlik vositalari, ularning analoglari yoki psixotrop moddalarni o‘tkazish maqsadini ko‘zlab, qonunga xilof ravishda tayyorlash, olish, saqlash va boshqa harakatlar qilish, shuningdek, ularni qonunga xilof ravishda o‘tkazish) va 276-moddasi (giyovandlik vositalari, ularning analoglari yoki psixotrop moddalarni o‘tkazish maqsadini ko‘zlamay qonunga xilof ravishda tayyorlash, egallash, saqlash va boshqa harakatlar) bilan jinoyat ishi qo‘zg‘atilgan. Hozirgi kunda dastlabki tergov harakatlari olib borilmoqda.
Izoh (0)