Фарғонада кўп қаватли уйдаги хонадонларнинг бирида ёнғин келиб чиқди, ўт икки хонадонга ҳам ўтиб кетди. Бу ҳақда «Дарё» мухбири Азизжон Эрматов хабар берди.
Вилоят Фавқулодда вазиятлар бошқармаси ахборот хизматининг аниқлаштиришича, 2021 йилнинг 7 июнь куни соат 10:05 да Фарғона шаҳар «Бобур» МФЙ Абдулла Қодирий кўчасида жойлашган 28-уйнинг 62-хонадонида ёнғин бўлаётгани ҳақида хабар келиб тушган.
Ёнғин жойига махсус бўлинмалар соат 10:15 да, яъни 10 дақиқада етиб борган ва соат 10:30 да ёнғин тўлиқ бартараф этилган.
Қайд этилишича, ёнғин оқибатида 62-хонадон балконининг 8 квадрат метр қисмидаги уй жиҳозлари ёниб кетган. Шунингдек, ёнғин юқори қаватлардаги яна икки хонадонга ҳам тарқалган. Оқибатда 66 ва 70-хонадонларнинг балконлари ҳам зарар кўрган. Ёнғиндан уйларнинг 120 квадрат метр майдони сақлаб қолинган.
Ёнғин қутқарувчилари томонидан 6 нафар фуқаро қутқарилган ва тез тиббий ёрдам хизматига етказилган.
Фавқулодда вазиятлар бошқармаси ахборот хизматининг қўшимча қилишича, ёнғинда куйиш, тан жароҳати ва ҳалок бўлиш ҳолатлари бўлмаган. Ҳозирда ёнғин сабаби ва моддий зарар миқдори аниқланмоқда.
Изоҳ (0)