Bosh vazir o‘rinbosari, turizm va sport vaziri Aziz Abduhakimov UNWTO (Butunjahon turizm tashkiloti) Bosh assambleyasi 24-sessiyasi vitse-prezidenti etib saylandi. Bu haqda Turizm va sport vazirligi axborot xizmati xabar berdi.
Ma’lum qilinishicha, UNWTO Yevropa mintaqaviy komissiyasining ovoz berish natijalariga ko‘ra, O‘zbekiston va Vengriya vakillari bir ovozdan UNWTO Bosh assambleyasining 2021-yil oktabrda Marokash shahrida bo‘lib o‘tadigan 24-sessiyasi vitse-prezidentlari etib saylangan.
O‘zbekiston vakili sifatida bosh vazir o‘rinbosari, turizm va sport vaziri Aziz Abduhakimov qayd etilgan.
Ma’lumot uchun, Aziz Abduhakimov bir vaqtning o‘zida bosh vazir o‘rinbosari va Turizmni rivojlantirish davlat qo‘mitasi raisi, Samarqand shahridagi “Ipak yo‘li” xalqaro turizm universiteti rektori, “Chorvoq” erkin turistik zonasi direksiyasi direktori, O‘zbekiston Badminton federatsiyasi raisi hamda O‘zbekiston Shaxmat federatsiyasi raisi hisoblanadi. Avvalroq Abduhakimov faqat bosh vazir o‘rinbosari sifatida maosh olishini ma’lum qilgandi.
Izoh (0)