Yoshlar ishlari agentligi IT Park va Innovatsion rivojlanish vazirligi bilan hamkorlikda “O‘zbekiston uchun 100 g‘oya” tanlovini ishga tushirdi.
Tanlovda millati, tili, dini va ijtimoiy kelib chiqishidan qat’i nazar 14 yoshdan 30 yoshgacha bo‘lgan barcha xohlovchilar ishtirok etishi mumkin.
Unda ishtirok etish uchun quyidagi yo‘nalishlardan biri bo‘yicha g‘oya taklif qilish lozim:
- ilm-fan, ta’lim va sog‘liqni saqlash;
- madaniyat va san’at;
- media;
- davlat xizmatlarini rivojlantirish;
- qurilish, arxitektura va transport;
- tadbirkorlik va bandlik;
- qishloq xo‘jaligi, irrigatsiya va agro texnologiyalar;
- axborot texnologiyalari va innovatsiyalar;
- ekologiya, qayta tiklanuvchi energiya manbalari va kimyo texnologiyalari.
Spot’ning yozishicha, faqat bitta yo‘nalish bo‘yicha ishtirok etish va g‘oya taqdim etish mumkin. Saralab olingan eng yaxshi 100 ta g‘oya mualliflari “O‘zbekiston yoshlari” ikkinchi forumida o‘z g‘oyasini O‘zbekiston Prezidentiga taqdim etish va hukumat ko‘magida uni amalga oshirish imkoniyatini qo‘lga kiritadi.
G‘oliblar g‘oyalarini amalga oshirishda qonunda belgilangan tartibda Yoshlar ishlari agentligi tomonidan moliyalashtirilishi mumkin.
Tanlovda ishtirok etish mutlaqo bepul. U uchta bosqichdan: saralash bosqichi, hududiy va respublika bosqichlaridan iborat.
Arizani yakka tartibda yoki jamoa sifatida topshirish mumkin. Bunda jamoada ishtirokchilar soni 5 nafardan oshmasligi kerak.
Eslatib o‘tamiz, Shavkat Mirziyoyev 2020-yilning yanvar oyida o‘tkazgan yig‘ilishda iqtidorli yoshlarni kashf qilish, ularning tashabbus va intilishlarini har tomonlama qo‘llab-quvvatlash maqsadida har bir viloyatda “O‘zbekiston uchun 100 g‘oya” loyihasini amalga oshirish zarurligini bildirgandi. “Har bir viloyatdan 100 tadan g‘oya kelib tushsa, O‘zbekiston bo‘yicha jami 1 ming 400 ta g‘oya bo‘ladi. 100 tadan hech bo‘lmaganda 10 tasi iqtisodiy jihatdan barqaror bo‘lib, albatta, mamlakat iqtisodiyotiga tatbiq etiladi”, — degan edi davlat rahbari.
Izoh (0)