O‘zbekiston va AQSh hukumati hamkorlikda Jizzax viloyatining Qo‘ytosh va Qorasoy hududlarida ikkita vaqtinchalik seysmik stansiya o‘rnatishni rejalashtirmoqda. Bu haqda AQShning Toshkentdagi elchixonasi matbuot xizmati “Gazeta.uz”ga ma’lum qildi.
Xabarda aytilishicha, 2-iyun kuni elchixona ijaraga olingan 14 ming dollarlik uskunalarni FVV huzuridagi Seysmoprognostik monitoring respublika markazi (SMRM)ga yetkazib berdi. SMRM stansiyalarni Kaliforniya shtatidagi San-Diyego universiteti (UCSD) bilan birgalikda o‘rnatadi.
2021-yil oxiriga qadar Qorasoyda doimiy stansiya o‘rnatilishi rejalashtirilgan. AQSh Davlat departamenti buning uchun zarur uskunalar sotib oladi va montaj ishlarini moliyalashtiradi.
Qorasoydagi doimiy stansiya 152 ta stansiyadan iborat Global seysmik tarmoq (GSN)ning bir qismiga aylanadi. GSN Kaliforniya shtatidagi San-Diyego universiteti va Seysmologiya qo‘shma tadqiqot instituti tomonidan birgalikda boshqariladi.
Ma’lumot uchun, birinchi seysmik stansiya 1901-yilda Toshkentda ishga tushirilgan va O‘zbekistonda muntazam instrumental seysmologik kuzatishlar boshlangan. Toshkent zilzilasi (1966-yil) O‘zbekistonda seysmologiyaning rivojlanishida muhim turtki bo‘ldi. O‘zbekistonda zilzila haqidagi bilimlar doirasi kengaydi, seysmik stansiyalar soni ko‘paydi.
FVV huzuridagi Seysmoprognostik monitoring respublika markazi Prezidentning 2017-yil 1-iyundagi farmoniga muvofiq tuzilgan. Markazning asosiy vazifasi O‘zbekiston hududining seysmikligini kuzatish va uning hududida hamda Markaziy Osiyo davlatlarining chegara hududlarida seysmik harakatlarning holatini tahlil qilishdir.
SMRMda 50 ta stantsiya faoliyat ko‘rsatmoqda, shundan 40 tasi seysmik stantsiyalar va 10 tasi prognoztik stansiyalar bo‘lib, ular bir vaqtning o‘zida seysmik jarayonlarni monitoring qilish ishlarini amalga oshiradi.
Izoh (0)