Toshkentda imkoniyati cheklangan qizni kaltaklagan ayol qilmishidan pushaymonligini aytib, uzr so‘radi (video)

Toshkentda imkoniyati cheklangan 24 yoshli qizni kaltaklagan ayolga nisbatan jinoyat ishi qo‘zg‘atilgani haqida xabar berilgandi. Ushbu voqea qanday bo‘lganini gumonlanuvchi va jabrlanuvchining vakili so‘zlab berdi. Bu haqda “Toshkent” telekanalidagi informatsion dasturida xabar berildi.

Qayd etilishicha, 28 yoshli Mumtozbegim Doniyorova o‘zining gung-soqov onasiga qarab turish uchun Farg‘ona viloyatidan Mohizodani keltirgan. Keyinchalik ayol onasi qiynalib qolgani sababli xizmatchisini jazolash maqsadida urib, tazyiq o‘tkazib, tan jarohati yetkazgan. Hozirda ayolga yetkazilgan tan jarohatining og‘irlik darajasini aniqlash bo‘yicha sud-tibbiy ekspertiza jarayoni ketmoqda.

“Qizim bilan birga bozorga borgandim va shu yerda uni yo‘qotib qo‘ydim. Telefon aloqada bo‘lgan, shu bilan uyga qaytib kelmadi. U ayol qizimni telefon qilib chaqirtirgan. Avval ular Andijonda bo‘lgan, keyin qizim bilan Toshkentga kelgan.

Bir kuni qizim otasiga yig‘lab telefon qildi. Meni olib ketinglar, dedi. Shunda ayol ‘Sen kimga telefon qilding?’ deb rosa urishibdi. Ayolning yana bir o‘rtog‘i qizimning og‘zini yopib turgan, o‘zi esa buning oyog‘iga pichoq sanchib olgan. Onasidan kechirim so‘raganda esa Mumtozbegim qizimning boshidan tepib turgan”, — deydi Mohizodaning onasi.

Ma’lum bo‘lishicha, kar-soqov qizni kaltaklagan ayol avval ham Jinoyat kodeksining bir nechta moddasi bilan sudlangan.

“Kechirim so‘ra, oyog‘iga yiqil, dedim. Lekin oyog‘ini o‘p, demadim. Uning onasidan ham kechirim so‘radim. Pushaymonman, hammaning oldida kechirim so‘rayman”, — deydi ayol.

Shuningdek, ijtimoiy tarmoqda tarqalgan ma’lumotda kaltaklangan ayolning homilador ekani, oqibatda homilasidan ayrilgani ham aytilgan. Lekin bu ma’lumotlar haqiqatga to‘g‘ri kelmasligi ma’lum qilindi.

Hozirda Mumtozbegim Doniyorovaga nisbatan Jinoyat kodeksining 110-moddasi 2-qismi (ojiz ahvoldaligi aybdorga ayon bo‘lgan shaxsga nisbatan qiynash xatti-harakatlarini amalga oshirish) bilan ish ochilgan. Unga nisbatan qamoqqa olish ehtiyot chorasi tayinlangan. Dastlabki tergov harakatlari olib borilmoqda.

Ma’lumot uchun, yuqoridagi modda bilan sudlangan shaxsga nisbatan 5 yilgacha ozodlikdan mahrum qilish jazosi tayinlanishi mumkin.